दाङ । मनसुनपूर्व तयारी बैठकले लुम्बिनी प्रदेशमा विपद् प्रतिकार्यलाई प्रभावकारी बनाउनेगरी योजनाको मस्यौदा तयार गर्न कार्यदल गठन गरिएको छ ।
मन्त्रालय अन्तर्गतको विपद् महाशाखा प्रमुखको संयोजकत्वमा विपद् प्रतिकार्य योजना २०८३ तयार पार्न कार्यदल गठन गर्ने निर्णय भएको हो । उक्त कार्यदलले योजनाको मस्यौदा तयार पार्नेछ ।
बैठकमा मन्त्रालयका सचिव विनोद लामिछानेका अनुसार : प्रि–मनसून अवधिमा देखापरेको उतारचढावका कारण तापक्रम बढेर मानव स्वास्थ्यमा असर पर्ने भएकाले अनुकूलनका योजनालाई प्रभावकारी रूपमा कार्यान्वयन गर्नुपर्नेमा सुझाव दिए । प्राकृतिक सम्पदाको संरक्षणलाई प्राथमिकतामा राखेर काम गर्नुपर्ने लामिछानेले उल्लेख गरे ।
बैठकमा जल तथा मौसम विज्ञान कार्यालय कोहलपुरका प्रमुख रामप्रसाद अवस्थीले प्रि–मनसुन सम्बन्धी पूर्वानुमान कार्यक्रम प्रस्तुत गरे । यस अवधिमा वर्षा सरदर रहने वा केही स्थानमा सामान्यभन्दा बढी हुनसक्ने सम्बन्धि चर्चा गरे । साथै अवस्थीले तापक्रम सरदर वा सोभन्दा बढी हुनसक्ने तथा हावाहुरी, चट्याङजन्य घटनाका अवस्था र आकस्मिक बाढीका घटनामा वृद्धि हुन सक्ने पनि बताए ।
अवस्थीका अनुसार जलवायु सूचकहरूमा परिवर्तन देखापरेको छ । अधिकतम तापक्रम वार्षिक ०.०५ र न्यूनतम तापक्रम ०.०६ डिग्रीले बढ्दै गएको जनाइएको छ । प्रि–मनसुन समयमा तापक्रम वृद्धि अन्य समयभन्दा बढी देखिएको छ । हिउँदमा अधिकतम तापक्रम र मनसुनमा न्यूनतम तापक्रममा सामान्य गिरावट आएको छ ।
वर्षा वार्षिक रूपमा दुई मिलिमिटरभन्दा बढीले घट्दै गएको तथा मनसुनको कूल वर्षामा कमी आएको उल्लेख गरिएको छ ।
अत्याधिक वर्षाका दिन भने मनसुन र हिउँदमा बढ्दै गएका छन् भने प्रि–मनसुनमा घटेका छन् । सुख्खा र गर्मी अवधि बढ्दै गएको, चिसोपनाको अवधि सामान्य रहेको तथा हावाहुरी, मेघगर्जन र चट्याङका घटनामा वृद्धि भइरहेको जानकारी दिइएको छ ।
बैठकले मनसुनपूर्व तयारीलाई थप व्यवस्थित, समन्वयात्मक र प्रभावकारी बनाउन सम्बन्धित सबै निकायलाई सक्रिय भूमिका निर्वाह गर्न आह्वान गरेको छ ।
