रूपन्देहीको सिद्धार्थनगर नगरपालिकाअन्तर्गत डन्डा खोलामा रहेको अव्यवस्थित डम्पिङ साइटका कारण स्थानीय बासिन्दा स्वास्थ्य समस्या र प्रदूषणको मारमा परेका छन्। यसै विषयलाई लिएर अधिवक्ता विवेक बख्रेल र कानूनकी विद्यार्थी अञ्जली सिलवालले संघीय सरकार, लुम्बिनी प्रदेश सरकार तथा सिद्धार्थनगर नगरपालिकासहित सम्बन्धित निकायविरुद्ध सर्वोच्च अदालतमा रिट दायर गरेका छन्।
रिट निवेदनमा डन्डा खोलामा सञ्चालित डम्पिङ साइट अनियन्त्रित रहेको र त्यसबाट तीव्र दुर्गन्ध तथा प्रदूषण फैलिएको उल्लेख गरिएको छ। यसले स्थानीय जनस्वास्थ्यमा गम्भीर असर पारेको दाबी निवेदकहरूले गरेका छन्।
सर्वोच्च अदालतमा दायर रिटमार्फत उनीहरूले तीनै तहका सरकारलाई जिम्मेवार ठहर गर्दै तत्काल प्रदूषण नियन्त्रणका लागि प्रभावकारी कदम चाल्न माग गरेका छन्।
