नेपालगन्ज । घोराहीका सडक, चोक, सार्वजनिक कार्यक्रम र सामाजिक अभियानहरूमा पछिल्लो समय एउटा नाम बारम्बार सुनिन थालेको छ— सविन प्रियासन।
कहिले युवासँगै हातमा झाडु बोकेर सरसफाइ अभियानमा देखिने, कहिले विपन्न विद्यार्थीका लागि सहयोग जुटाउँदै हिँड्ने, त कहिले शहर विकासका विषयमा खुला बहस गरिरहेको उनको सक्रियताले अहिले घोराहीको राजनीतिक वृत्तमै चर्चा पाउन थालेको छ।
जब उनले आउँदो स्थानीय तह निर्वाचनमा घोराही उपमहानगरपालिकाको मेयर पदमा उम्मेदवारी दिने संकेत गरे, त्यसले केवल चासो मात्र पैदा गरेन, एउटा नयाँ प्रश्न पनि जन्मायो—
“के घोराही अब परम्परागत होइन, नयाँ शैलीको नेतृत्व खोज्दैछ ?”
वर्षौंदेखि उही राजनीतिक घेराभित्र घुमिरहेको स्थानीय राजनीतिमा प्रियासनको उपस्थितिलाई धेरैले फरक रूपमा हेर्न थालेका छन्। कारण, उनी चुनाव नजिकिँदा मात्र देखिने पात्र होइनन्। कला, साहित्य, खेलकुद, पत्रकारिता, शिक्षा र सामाजिक अभियानसँगको निरन्तर सक्रियताले उनको छुट्टै पहिचान निर्माण गरेको छ।
विशेषगरी “घोराही बनाऔँ अभियान” मार्फत उनले उठाएका मुद्दाहरूले युवापुस्तामाझ प्रभाव जमाएको देखिन्छ। शहरको सौन्दर्य, सार्वजनिक उत्तरदायित्व, शिक्षा, सरसफाइ र विकासका विषयमा निरन्तर आवाज उठाउँदै आएका कारण उनी विस्तारै सामाजिक अभियन्ताबाट सम्भावित नेतृत्वको रूपमा हेरिन थालेका छन्।
हालै विपन्न, दलित तथा जनजाति समुदायका विद्यार्थीलाई सहुलियत शुल्कमा प्लस टु अध्ययन गराउने सहकार्यले पनि उनको सामाजिक दृष्टिकोणलाई थप उजागर गरेको छ। आर्थिक रूपमा कमजोर परिवारका विद्यार्थीलाई अवसर दिलाउने प्रयासले अभिभावक र युवामाझ सकारात्मक सन्देश प्रवाह गरेको देखिन्छ।
लामो समयदेखि पत्रकारितामार्फत समाज, राजनीति, विकास र जनजीवनका सवालहरू उठाउँदै आएका प्रियासनले अब प्रत्यक्ष राजनीतिक यात्रातर्फ उन्मुख हुने संकेत गरेका छन्। पत्रकारिताको संसारबाट राजनीतिक नेतृत्वतर्फको यात्रा नेपाली समाजमा नयाँ विषय होइन। तर हरेक व्यक्तिको पृष्ठभूमि, दृष्टिकोण र जनविश्वास फरक हुन्छ।
सविन प्रियासनको हकमा पनि अहिले यही प्रश्न उठ्न थालेको छ— सञ्चारमार्फत समाज बुझेका एक पत्रकारका लागि राजनीति कति सहज होला ? घोराहीको नेतृत्वमा पुग्ने उनको प्रयास केवल चुनावी महत्वाकांक्षा हो, वा लामो समयदेखि उठाउँदै आएका मुद्दालाई व्यवहारमै कार्यान्वयन गर्ने उद्देश्य ?
यता, घोराही तीव्र शहरीकरणको चरणमा छ। तर विकाससँगै चुनौतीहरू पनि थपिँदै गएका छन्— अव्यवस्थित बजार, फोहोर व्यवस्थापन, बेरोजगारी, युवाको पलायन, सार्वजनिक सेवाप्रतिको असन्तुष्टि र अधुरा पूर्वाधार योजना।
यस्ता समस्याका बीच जनताले अब भाषणभन्दा परिणाम दिने नेतृत्व खोज्न थालेको विश्लेषण गर्न थालिएको छ। सायद यही कारण पनि सामाजिक अभियानबाट आएका व्यक्तिप्रति युवापुस्ताको आकर्षण बढिरहेको देखिन्छ।
तर सामाजिक अभियान र राजनीतिक नेतृत्वबीच ठूलो दूरी हुन्छ। जनअपेक्षा पूरा गर्न स्पष्ट योजना, प्रशासनिक क्षमता, राजनीतिक परिपक्वता र व्यवहारिक नेतृत्व आवश्यक पर्छ। प्रियासनका अगाडि पनि चुनौती कम छैनन्।
यद्यपि एउटा कुरा भने स्पष्ट देखिन्छ— घोराहीमा अहिले नयाँ पुस्ताको नेतृत्वबारे बहस सुरु भएको छ। र त्यो बहसको केन्द्रमा सविन प्रियासनको नाम पनि जोडिएको छ।
भोलिको चुनावी परिणाम जे आए पनि, उनले उठाएको बहसले घोराहीको राजनीतिमा नयाँ सोच, नयाँ पुस्ताको सहभागिता र वैकल्पिक नेतृत्वबारे गम्भीर प्रश्न भने खडा गरिसकेको छ।
