धनगढी । सुदूरपश्चिम प्रदेश डीआईजी ओमबहादुर राना मगरको कुशल नेतृत्वमा रहेको कार्यालयले आर्थिक वर्षको पहिलो ९ महिनामा ८५.११ प्रतिशत अंक प्राप्त गरी देशभर प्रथम स्थान हासिल गरेको हो।
यो सफलता कोसेढुङ्गा हो किनभने यसअघि अर्धवार्षिक मूल्याङ्कनमा समेत यही कार्यालयले ८०.२१ प्रतिशत अंकसहित उत्कृष्ट प्रदर्शन गरिसकेको थियो।
प्रहरी संगठनको कार्यसम्पादन, शान्ति–सुरक्षा व्यवस्थापन, सेवा प्रवाह तथा संगठनात्मक प्रभावकारितालगायत विभिन्न सूचकमा गरिएको मूल्याङ्कनमा सुदूरपश्चिमले उत्कृष्टता कायम राख्यो।
विशेषगरी हालै सम्पन्न निर्वाचनलाई शान्तिपूर्ण, मर्यादित र सफल बनाउन डीआईजी रानाको टोलीले खेलेको भूमिकालाई उच्च मूल्याङ्कन गरिएको छ।
सोही उपलब्धिको कदरस्वरूप प्रहरी महानिरीक्षक (आईजीपी) दानबहादुर कार्कीले डीआईजी रानालाई नगदसहित सम्मान तथा पुरस्कृत गरेका छन्।
सुदूरपश्चिम प्रदेश प्रहरी कार्यालयले समर्पण, सेवा र सुरक्षालाई प्राथमिकतामा राख्दै नागरिकमैत्री प्रहरी सेवा प्रवाह गरिरहेको छ।
यो उपलब्धिले प्रदेश प्रहरीको मनोबल अत्यन्त उच्च बनाएको छ तथा आगामी दिनमा अझ प्रभावकारी सेवा प्रदान गर्न प्रेरणा मिलेको डीआईजी रानाले बताएका छन्।
सुदूरपश्चिमको यो कीर्तिमानले समग्र नेपाल प्रहरीकै लागि उदाहरणीय बनेको छ।
