तनहुँ । ब्यास नगरपालिका–५ चापाघाटस्थित पृथ्वीराजमार्गमा असंवेदनशील रूपमा पशु ओसारपसार गर्ने एक सवारी साधनलाई प्रहरीले नियन्त्रणमा लिएको छ।
जिल्ला प्रहरी कार्यालय तनहुँबाट खटिएको चेकिङ टोलीले आइतबार राति ५ वटा गोरुसहितको पिकअप गाडी नियन्त्रणमा लिएको हो।
थर्पुबाट आँबुखैरेनी तर्फ जाँदै गरेको टाटा योद्धा पिकअपमा कुनै कागजात नभएको र पशुलाई निकै कष्ट हुने गरी ‘असंवेदनशील’ रूपमा राखेर ल्याइएको अवस्थामा फेला पारिएको थियो।
प्रहरीले उक्त सवारी साधनलाई राति करिब ९:२५ बजे नियन्त्रणमा लिई आवश्यक अनुसन्धानका लागि जिल्ला प्रहरी कार्यालय ल्याएको थियो।
जिल्ला प्रहरी कार्यालय तनहुँका सूचना अधिकारी एवं प्रहरी नायव उपरीक्षक द्वारिका प्रसाद घिमिरेका अनुसार नियन्त्रणमा लिइएको गाडीलाई सोमबार बिहान ८:०० बजे नियमानुसार कारबाहीका लागि ब्यास नगरपालिकाको कार्यालय पठाइएको थियो।
नगरपालिकाले उक्त सवारी साधनलाई १० हजार रुपैयाँ जरिवाना गरी छाडेको सूचना अधिकारी घिमिरेले जानकारी दिए।
पशु ढुवानी गर्दा न्यूनतम मापदण्ड समेत पालना नगरेको र अवैध रूपमा ओसारपसार गरेको पाइएपछि प्रहरीले उक्त कदम चालेको हो।
