दीपेन्द्र सरकारको अन्तिम दिनको दुर्लभ तस्बिर

काठमाडौं । वि.सं. २०५८ साल जेठ १९ गते, शुक्रबार। दरबार हत्याकाण्ड हुनुभन्दा केही घण्टाअघि।
आज यो तस्बिर सार्वजनिक गर्दा मन निकै भारी भएको छ।
त्यो दिन दिउँसो करिब ३ बजेतिर म, सागर श्रेष्ठ, र मेरो मित्र रवि मानन्धर सातदोबाटोस्थित स्विमिङ पुल र दशरथ रङ्गशाला क्षेत्रमा थियौं। त्यही समयमा युवराजाधिराज श्री ५ दीपेन्द्र बीर विक्रम शाहदेव सरकार दशरथ रङ्गशालामा भइरहेको खेलकुद कार्यक्रमको तयारी तथा निरीक्षणका लागि आउनुभएको थियो।
हामीले उहाँको तस्बिर खिच्न खोज्दा दरबारका ADC ले रोक्नुभयो। तर त्यसबारे जानकारी पाएपछि युवराजाधिराज स्वयंले ADC लाई हामीकहाँ पठाउनुभयो र तस्बिर लिन अनुमति दिनुभयो। त्यसपछि हामी उहाँनजिक पुग्यौं। उहाँले अत्यन्त सहज र खुसी मुद्रामा विभिन्न पोज दिँदै तस्बिर खिचाउनुभयो।
त्यो साँझ देशको इतिहासकै सबैभन्दा दुःखद घटनामध्ये एक घट्नेछ भन्ने कल्पना हामीमध्ये कसैले पनि गरेका थिएनौं।
आज फर्केर हेर्दा, यो तस्बिर उहाँको जीवनको अन्तिम सार्वजनिक तस्बिरहरूमध्ये एक हुनसक्ने सम्झनाले मन भावुक बनाउँछ।
📷 फोटो: सागर श्रेष्ठ