दाङ । घोराहीस्थित अम्बिकेश्वरी कलेजले आयोजना गरेको खेल सप्ताहमा सहभागी भएर विजयी खेलाडीहरूलाई पुरस्कार वितरण गरिएको छ। कलेजले शुक्रबार घोराहीमा विशेष कार्यक्रमको आयोजना गरी पुरस्कार वितरण गरेको हो। कलेजका विद्यार्थी संजीव चौधरीको अध्यक्षतामा सम्पन्न कार्यक्रममा प्रमुख अतिथि प्रदेश खेलकुद परिषदका सदस्य सचिव तिरणराज गौतम, विशिष्ट अतिथि नेपाल पत्रकार महासंघका केन्द्रीय सचिव एवं घोराही बनाउँ अभियानका संयोजक सविन प्रियासन, कलेजका प्रिन्सिपल चन्द्रप्रकाश खनाल लगायतकाले विजयी खेलाडीहरूलाई प्रमाणपत्र, मेडल र ट्रफी वितरण गर्नुभएको थियो। फुटबल, क्रिकेट भलिबल, फुट्सल, टेबल टेनिस, ब्याडमिन्टनलगायत विभिन्न खेलहरुमा सहभागी विद्यार्थीहरूलाई पुरस्कार वितरण गरिएको गरिएको हो । सो अवसरमा बोल्दै प्रमुख अतिथि लुम्बिनी प्रदेश खेलकुद परिषदका सदस्य सचिव तिरणराज गौतमले खेल क्षेत्रको विकासका लागि सरकारले पर्याप्त बजेट विनियोजन गर्नुपर्ने बताउनुभयो। यसैगरी विशिष्ट अतिथि घोराही बनाउ अभियानका संयोजक सबिन प्रियसनले नेपाली खेल क्षेत्रलाई विश्वजगतमा पुर्याउन खेल शिक्षा अनिवार्य बनाउनुपर्ने बताउनुभयो । कलेजका प्रिन्सिपल चन्द्र प्रकाश खनालले खेलले शारीरिक र मानसिक सन्तुलन राख्ने भएका कारण सबैले यसलाई अनुसरण गर्नुपर्ने बताउनुभयो । कलेजका विद्यार्थी मनिष भुसालको स्वागत मन्तव्यबाट सुरु भएको कार्यक्रमको सञ्चालन विद्यार्थी केडिया पोखरेलले गर्नुभएको थियो।
