पर्सा । यातायात व्यवस्था कार्यालय, सवारी चालक अनुमतिपत्र पर्साका तत्कालीन अधिकृत कमलराज गौतम गैरकानूनी सम्पत्ति आर्जन गरी भ्रष्टाचार गरेको अभियोगमा विशेष अदालतबाट दोषी ठहर भएका छन्।
अदालतले उनलाई १ वर्ष कैद, १ करोड ८ लाख रुपैयाँभन्दा बढी जरिवाना तथा बिगो बराबरको सम्पत्ति जफत गर्ने फैसला गरेको छ। साथै पीडित राहत कोषमा ४ लाख ३२ हजार रुपैयाँभन्दा बढी रकम जम्मा गर्नुपर्ने आदेश पनि दिएको छ।
अख्तियार दुरुपयोग अनुसन्धान आयोगले २०८२ असार ३ गते गौतमविरुद्ध भ्रष्टाचार मुद्दा दायर गरेको थियो। अदालतले उनको १ करोड रुपैयाँ बराबरको सम्पत्तिको वैध स्रोत पुष्टि हुन नसकेको ठहर गरेको हो।
