बाँके । नेपालगञ्ज उपमहानगरपालिका–१७ स्थित शहादत मस्जिद, ईदगाह तथा कर्बला व्यवस्थापन समिति परसपुरका कोषाध्यक्ष मंसूर अली इद्रिशीले आफ्नो पदबाट राजीनामा दिएका छन्। कोषाध्यक्ष इद्रिशीले लामो समयदेखि गरिब, दुःखी, पीडित र न्यायको खोजीमा रहेका नागरिकहरूको आवाज बन्दै आएका पत्रकार लिमरा खबर सञ्चार माध्यममा समाचार प्रमुखको जिम्मेवारी निर्वाह गर्दै आएका छन्।
उनले २०७९ साल वैशाख २१ गतेदेखि समितिको कोषाध्यक्षको जिम्मेवारी सम्हाल्दै आएको उल्लेख गर्दै व्यक्तिगत कारणवश २०८३ साल असार १२ गतेदेखि लागू हुने गरी पदबाट राजीनामा दिएको जानकारी दिएका हुन्।
राजीनामा पत्रमार्फत उनले समितिमा रहँदा साथ, सहयोग र विश्वास गर्ने सम्पूर्ण पदाधिकारी, सदस्य, स्थानीयवासी तथा शुभेच्छुकप्रति हार्दिक आभार व्यक्त गरेका छन्।
साथै, पदबाट अलग भए पनि शहादत मस्जिद, ईदगाह तथा कर्बलाको विकास, व्यवस्थापन, धार्मिक गतिविधि र सामाजिक सेवाका कार्यमा आफ्नो साथ, सहयोग र समर्थन निरन्तर रहने प्रतिबद्धता व्यक्त गरेका छन्।
समितिका एक जिम्मेवार पदाधिकारीको राजीनामालाई स्थानीय मुस्लिम समुदायले चासोका साथ हेरेका छन्। अब समितिले रिक्त भएको कोषाध्यक्ष पदमा नयाँ जिम्मेवारी कसलाई दिने भन्ने विषयमा आगामी निर्णय गर्ने अपेक्षा गरिएको छ।
