प्रश्न : स्थानीय तहलाई तपाईंले ‘हाम्रो साझा सम्पत्ति’ भन्नुभएको छ। यसको अर्थ के हो?
सबिन प्रियासन : स्थानीय तह भनेको कुनै एउटा व्यक्ति, राजनीतिक दल वा निर्वाचित जनप्रतिनिधिको मात्रै सम्पत्ति होइन। यो सम्पूर्ण नागरिकको साझा संस्था हो। जनताले तिरेको कर, नागरिकको श्रम, सहभागिता र सामूहिक प्रयासबाट स्थानीय तह सञ्चालन हुन्छ। त्यसैले यसको विकास, संरक्षण र समृद्धिको जिम्मेवारी पनि हामी सबैको हो। घोराही उपमहानगरपालिकालाई समृद्ध बनाउने हो भने नागरिकले आफ्नो नगरप्रतिको अपनत्व महसुस गर्नुपर्छ। जनप्रतिनिधि, कर्मचारी, निजी क्षेत्र, सामाजिक सङ्घसंस्था, सञ्चारकर्मी, बुद्धिजीवी, युवा, महिला र आम नागरिकबीच सहकार्य आवश्यक छ। स्थानीय तहलाई साझा सम्पत्ति ठानेर काम गर्न सक्यौँ भने विकासका काममा स्वामित्व र जवाफदेहिता दुवै बढ्छन्।
प्रश्न : स्थानीय तहको विकास भन्नासाथ धेरैले मेयरलाई मात्रै सम्झिने गरेको पाइन्छ। तपाईंको धारणा के छ?
सबिन प्रियासन : यो सोचमा परिवर्तन आउन आवश्यक छ। मेयर स्थानीय सरकारको महत्त्वपूर्ण नेतृत्वकर्ता हुनुहुन्छ, तर उहाँ एक्लैले पालिका बनाउन सक्नुहुन्न। उपमेयर, वडाध्यक्ष, वडा सदस्य, कार्यपालिका सदस्य, कर्मचारी र नागरिक सबैको भूमिका उत्तिकै महत्त्वपूर्ण हुन्छ। पालिकाको नीति निर्माणदेखि बजेट विनियोजन, योजना छनोट, कार्यान्वयन र अनुगमनसम्म सबै पक्षको सहभागिता चाहिन्छ। उपमेयरले न्यायिक समिति, अनुगमन र अन्य जिम्मेवारीमा प्रभावकारी भूमिका निर्वाह गर्न सक्नुहुन्छ। वडाध्यक्षले स्थानीय आवश्यकताअनुसार विकासका योजना अघि बढाउन सक्नुहुन्छ भने वडा सदस्यले जनताको आवाज सम्बन्धित निकायसम्म पुर्याउन सक्छन्। त्यसैले मेयर बन्ने आकांक्षा राख्ने व्यक्तिलाई मात्रै होइन, समाजका लागि केही गर्न चाहने सबैलाई स्थानीय नेतृत्वमा आउन प्रेरित गर्नुपर्छ।
प्रश्न : उपमेयर, वडाध्यक्ष र वडा सदस्यजस्ता पदको गरिमा बढाउन के गर्नुपर्छ?
सबिन प्रियासन : सबैभन्दा पहिले यी पदलाई सानो वा ठूलो भन्ने दृष्टिकोण त्याग्नुपर्छ। पदको गरिमा त्यसमा बसेर गर्ने कामले निर्धारण गर्छ। वडामा जनताको समस्या सुन्ने, विकासका काममा सक्रिय हुने, नागरिकको दुःखसुखमा साथ दिने र सार्वजनिक स्रोतको सदुपयोग गर्ने जनप्रतिनिधि सधैँ सम्मानित हुन्छन्। निर्वाचनमा उम्मेदवार बन्ने व्यक्तिले पद र प्रतिष्ठाका लागि होइन, जिम्मेवारी पूरा गर्न आफूलाई तयार गर्नुपर्छ। स्थानीय तहमा राम्रो काम गर्न चाहने, इमानदार र समाजप्रति जिम्मेवार व्यक्तिहरूलाई प्रोत्साहन गर्नुपर्छ। समाजका लागि केही गर्छु भन्ने व्यक्तिलाई हाम्रो साथ र सहयोग रहनेछ। नेतृत्वमा आउने व्यक्तिले पनि जनताको विश्वासलाई आफ्नो सबैभन्दा ठूलो सम्पत्ति ठान्नुपर्छ।
प्रश्न : स्थानीय तहको निर्वाचन नजिकिँदै गर्दा उम्मेदवार बन्ने आकांक्षीहरू बढिरहेका छन्। उनीहरूलाई तपाईंको सुझाव के छ?
सबिन प्रियासन : उम्मेदवार बन्न चाहनु आफैँमा नराम्रो कुरा होइन। लोकतन्त्रमा हरेक योग्य नागरिकलाई नेतृत्वमा आउने अधिकार छ। तर उम्मेदवारीसँगै जिम्मेवारीबोध पनि हुनुपर्छ। म किन उम्मेदवार बन्न खोज्दै छु, निर्वाचित भएँ भने के गर्छु, जनताका समस्यालाई कसरी सम्बोधन गर्छु र आफ्नो प्रतिबद्धता पूरा गर्न कस्तो योजना बनाएको छु भन्ने विषयमा स्पष्ट हुनुपर्छ। व्यक्तिगत महत्त्वाकांक्षाभन्दा माथि उठेर समाजको हितलाई प्राथमिकता दिनुपर्छ। निर्वाचन जित्नु मात्रै सफलता होइन, जनताको जीवनमा सकारात्मक परिवर्तन ल्याउनु वास्तविक सफलता हो। त्यसैले पदमा पुग्न चाहने व्यक्तिले अहिलेबाटै समाजमा सक्रिय भूमिका निर्वाह गर्नुपर्छ। जनताका समस्या बुझ्नुपर्छ र समाधानका लागि सामूहिक प्रयास गर्नुपर्छ।
प्रश्न : घोराही उपमहानगरपालिकाको विकासका लागि कस्तो नेतृत्व र कार्यशैली आवश्यक छ?
सबिन प्रियासन : घोराहीको विकासका लागि दूरदृष्टि, इमानदारी, योजनाबद्ध काम र सबैलाई समेट्न सक्ने नेतृत्व आवश्यक छ। शिक्षा, स्वास्थ्य, कृषि, पर्यटन, रोजगार, उद्यमशीलता, खेलकुद, कला, साहित्य, संस्कृति, सञ्चार र सुशासनजस्ता क्षेत्रलाई एकीकृत रूपमा अघि बढाउनुपर्छ। १९ वटै वडाको भौगोलिक अवस्था, जनसङ्ख्या, आवश्यकता र सम्भावना फरक छन्। त्यसैले सबै वडामा एउटै प्रकृतिको योजना लागू गरेर मात्रै समान विकास सम्भव हुँदैन। प्रत्येक वडाको विशेषता पहिचान गरेर प्राथमिकताका आधारमा कार्यक्रम सञ्चालन गर्नुपर्छ। योजना बनाउँदा नागरिकको सहभागिता सुनिश्चित गर्नुपर्छ र बजेट खर्चको पारदर्शिता कायम गर्नुपर्छ। विकासका कामको नियमित अनुगमन र मूल्याङ्कन पनि उत्तिकै आवश्यक छ। जनप्रतिनिधिले नागरिकलाई सेवाग्राही मात्रै होइन, विकासको साझेदारका रूपमा हेर्नुपर्छ।
प्रश्न : राजनीतिक प्रतिस्पर्धाबीच साझा विकासको वातावरण कसरी निर्माण गर्न सकिन्छ?
सबिन प्रियासन : निर्वाचनमा प्रतिस्पर्धा हुनु लोकतन्त्रको सुन्दर पक्ष हो। कसैले मेयरमा उम्मेदवारी दिन सक्छ, कसैले उपमेयरमा, कसैले वडाध्यक्ष वा वडा सदस्यमा। कसैले कुनै उम्मेदवारलाई समर्थन गर्न सक्छ भने कसैले अर्को व्यक्तिलाई। यो नागरिकको स्वतन्त्रता हो। तर निर्वाचनको प्रतिस्पर्धाले समाजमा कटुता, द्वेष र विभाजन सिर्जना गर्नु हुँदैन। निर्वाचन सकिएपछि सबैले आफ्नो नगरको हितका लागि मिलेर काम गर्नुपर्छ। राम्रो काम गर्ने जोसुकैलाई प्रोत्साहन गर्नुपर्छ र कमजोरी देखिएमा रचनात्मक सुझाव दिनुपर्छ। विकास कुनै एउटा दल वा व्यक्तिको मात्रै उपलब्धि होइन। यसका लागि सबैको योगदान आवश्यक हुन्छ। साझा लक्ष्य घोराहीको समृद्धि हुनुपर्छ।
प्रश्न : अन्त्यमा, समाजका लागि केही गर्न चाहने नागरिकलाई के भन्न चाहनुहुन्छ?
सबिन प्रियासन : समाज परिवर्तनका लागि ठूलो पदमा पुग्नैपर्छ भन्ने छैन। आफ्नो टोल सफा राख्ने, बालबालिकाको शिक्षामा सहयोग गर्ने, बिरामीलाई साथ दिने, युवालाई रोजगार र उद्यमशीलतातर्फ प्रेरित गर्ने, सामाजिक विकृति हटाउन पहल गर्ने र सार्वजनिक सम्पत्तिको संरक्षण गर्ने क
