नेपाल प्रहरीले सामाजिक सञ्जालमा भाइरल बनेको अडियोबारे गम्भीर ध्यानाकर्षण भएको जनाएको छ। उक्त अफवाहपूर्ण अडियो फेसबुक म्यासेन्जर तथा ग्रुपहरुमा भाइरल बनेको जानकारी प्राप्त भएपछि प्रहरीले यसमा संलग्न व्यक्तिहरुको खोजी सुरु गरेको जनाएको छ। यस्ता गतिविधिमा संलग्नलाई पक्राउ गरि प्रचलित कानुन बमोजिम सजाय हुने प्रहरीले बताएको छ। उक्त अडियो ‘फेक’ रहेकोले भ्रममा नपर्न र आतंकित नहुन पनि प्रहरीले आग्रह गरेको छ। उक्त अडियोमा नर्भिक अस्पतालमा ९ जनामा कोरोना भाइरस संक्रमणको परीक्षण गरिएको र त्यसमध्ये ६ जनामा पोजेटिभ अर्थात कोरोना संक्रमण रहेको रिपोर्ट आएको दाबी गरिएको छ। प्रहरीले अस्पतालसँग बुझ्दा त्यस्तो कुनै नरहेको प्रस्ट पारेको छ।
