कोरोनाको संक्रमणबाट बच्न आवश्यक पर्ने मास्क नेपालमै अभाव भइरहेका बेला भारततर्फ तस्करी हुने गरेको पाइएको छ ।
नेपालमै उत्पादित मास्क भारततर्फ लगिंदै गरेको अवस्थामा २३ चैतमा विराटनगरको भारतीय सीमावर्ती क्षेत्रबाट सशस्त्र प्रहरीले पक्राउ गरेको छ ।
सातजना व्यक्तिले सातवटा साइकलमा सात बोरा मास्क भारततर्फ लैजाँदै गर्दा पक्राउ गरिएको सशस्त्र प्रहरीले जनाएको छ ।
साइकल र मास्क नियन्त्रणमा लिएर विराटनगर भन्सार कार्यालयमा बुझाइएको छ।
विराटनगरमै बनेको कपडाको साधारण मास्क बिहारका गाउँमा बिक्रीका लागि लगिएको बताइएको छ । स्थानीयले बनाएको हुनाले उत्पादकको लोगो बिनाको मास्क र साइकलको रु १ लाख ५२ हजार रुपैयाँ मूल्यांकन गरेर विराटनगर भन्सार कार्यालयमा बुझाइएको सशस्त्र प्रहरी ३ नम्बर गण मोरङका एसपी नेत्रबहादुर कार्कीले बताए।
