प्रधानमन्त्री ओली काठमाडौं प्रधानमन्त्री केपी शर्मा ओलीले कोरोना भाइरसको संक्रमण रोकथाम तथा नियन्त्रण बारे सातवटै प्रदेशका मुख्यमन्त्रीसँग छलफल गरेका छन्। प्रधानमन्त्री ओलीले शनिबार सिहदरबारस्थित एक्सन रूमबाट सातै प्रदेशका मुख्यमन्त्रीसँग छलफल गरेका हुन। छलफलमा प्रधानमन्त्री ओलीले लकडाउन तत्काल नहट्ने र नेपालभारत सीमा नाकामा अझै कडाइ गरिने बताएका छन्। मुख्यमन्त्रीहरुसँग नियन्त्रण, रोकथाम र उपचारको क्रममा गरिएका प्रयासबार जानकारी लिँदै प्रधानमन्त्री ओलीले कोरोना रोकथाम तथा नियन्त्रणका लागि प्रदेश सरकारले गरेका प्रयासहरू सकारात्मक नै रहेको र यसलाई अझ समन्वयात्मक ढंगले अघि बढ्न जरूरी रहेको बताएको प्रधानमन्त्रीको सचिवालयले जनाएको छ। लकडाउन छिट्टै अन्त्य नहुने, सीमामा अझ कडाइ हुने, भावुक कुरा गरेर लापरबाही स्वीकार्य नहुने र संक्रमण फैलिनबाट सबै सचेत हुनु अनिवार्य रहेको स्पष्ट गर्दै प्रधानमन्त्री ओलीले भने-‘भारतमा संक्रमण फैलिने क्रम बढिरहेको देख्दादेख्दै यहाँ लकडाउन खुला गर्ने कुरा हुन सक्दैन।’ लकडाउनमा प्रशासनिक लापरबाही नगर्न समेत प्रधानमन्त्री ओलीले निर्देशन दिए। प्रशासनिक लापरवाही हुनैभएन, मेला लाग्ने, मान्छे जम्मा हुने आदि क्रियाकलाप गर्न रोक्नका लागि प्रशासन र प्रहरी सजग हुनैपर्ने, त्यसका लागि केन्द्रबाटै एकरूपताको लागि परिपत्र जारी गरिने समेत उनले बताए। प्रधानमन्त्री ओलीले सरसफाईमा ध्यान दिन, माक्स, चश्मा प्रयोग गर्न र मनोवैज्ञानिक काउन्सेलिङ बढाउन पनि पनि प्रदेशका मुख्यमन्त्रीहरुलाई आग्रह गरेका छन्। साथै प्रधानमन्त्री ओलीले कोरोना भाइरस संक्रमण नियन्त्रण तथा रोकथामका लागि अलग्गै संयन्त्र आवश्यक नरहेको पनि बताए।
