लकडाउनको बेला प्रहरीमाथि ढुंगामुढा गर्ने १३ जना पक्राउ

प्रकशित मिति : २ बैशाख २०७७, मंगलवार १५:३०

जनकपुरधाम लकडाउन पालना गराउने क्रममा सिरहाको पटेर्वामा सोमबार साँझ भएको घटनामा संलग्न १३ जनालाई प्रहरीले पक्राउ गरेको छ । लकडाउन पालना गराउने क्रममा गस्तीमा रहेका प्रहरीमाथि आक्रमण गरेको आरोपमा उनीहरुलाई पक्राउ गरिएको हो ।
सिरहाका एसपी उमाप्रसाद चतुर्वेदीले झडपमा संलग्नमध्ये १३ जना स्थानीयलाई नियन्त्रणमा लिइएको जानकारी दिएका छन् । ‘घटनामा संलग्न मध्ये १३ जनालाई नियन्त्रणमा लिएका छौं, अन्यको खोजी भइरहेको छ,’ एसपी चतुर्वेदीले भने । अहिले पटेर्वाको स्थिति नियन्त्रणमा रहेको उनले बताए । चतुर्वेदीले घटनास्थलमा प्रहरीले गस्ती गरिरहेको जानकारी दिए ।
सिरहाको सिरहा नगरपालिका–१७ पटेर्वामा लकडाउन उल्लंघन नगर्न सम्झाइ बुझाइ गरिरहेको अवस्थामा प्रहरीमाथि ढुंगामुढा हुँदा दोहरो झडप भएको थियो । झडप साम्य पार्न प्रहरीले २३ राउण्ड हवाइ फायर गरेको थियो ।
झडपको क्रममा स्थानीयले गरेको ढुंगामुढमा परी तीनजना प्रहरी घाइते भएका छन् भने प्रहरीको दुइटा गाडीमा क्षति पुगेको छ । घटनापछि त्यहाँका अधिकांश व्यक्तिहरु फरार रहेको बताइएको छ ।

प्रकशित मिति : २ बैशाख २०७७, मंगलवार १५:३०