दाङ वैशाख ६ कोरोना भाइरस कोभिड–१९ रोकथाम तथा नियन्त्रणका लागि सरकारले गरेको लकडाउनका कारण समस्यामा परेका पत्रकारहरुलाई प्रेस संगठनले सहयोग गर्ने भएको छ । प्रेस संगठनका जिल्ला सयोजक प्रकाश चौधरी र सहसयोजक जेएन सागरले एक प्रेस बिज्ञपति जारी गर्दै लकडाउनका क्रममा श्रमजीवी पत्रकारहरुलाई दैनिक जीवनयापनमा समस्या परेका पत्रकारलाई सम्पर्क गर्न आग्रह गरेका छ्न ।
खासगरी खाद्यान्न नभएर पत्रकारहरुलाई भोकै बस्नुपर्ने अवस्था नआओस भन्नेतर्फ हाम्रो संगठन सजग छ । तसर्थ यस्तो समस्यामा परेका पत्रकार साथीहरुलाई हाम्रो संगठनका जिम्मेवार साथीहरुसँग सम्पर्क गर्न हार्दिक अनुरोध गर्दछौ । विज्ञप्तिमा भनिएको छ,”अहिले विश्व प्रभावित भएको छ । महामारीकै रुप लिएको कोरोना भाइरसको संक्रमणका कारण लामो समयसम्म लकडाउन चलिरहेको छ ।
नेपालमा पनि संक्रमितहरु बढिरहेको अवस्थामा अहिले संक्रमणबाट आफूपनि जोगिने र अरुलाई पनि जोगाउनुपर्ने अवस्था छ । यस्तो अवस्थालाई मध्यनजर गर्दै आम नागरिकलाई सुसूचित गर्ने काममा पत्रकारले सूचनावाहकको काम पनि गरिरहनु नै परेको छ । ” अहिलेसम्म सुरक्षितरुपमा पत्रकारिता गरिरहेकोमा खुशी व्यक्त गर्दै आफ्नो सुरक्षामा अझै ध्यान दिन आम पत्रकारहरुमा विनम्र आग्रह गरिएको छ । कोरोना संक्रमण रोक्न लकडाउन चलिरहेको अवस्थामा सकभर जो जहाँ छौं, त्यहीबाट सूचना प्रवाह गरौं । पहिले रोगबाट बचौं, त्यसपछि पेशागत जिम्मेवारी पनि पूरा गरौं ।