अत्यावश्यकलाई सवारी साधनलाई रोकेर ठेकेदारलाई धमाधम पास

प्रकशित मिति : ८ बैशाख २०७७, सोमबार ०८:३४

कोरोना भाइरस संक्रमण रोक्न कागजी पास वितरण बन्द गरेको जिल्ला प्रशासन कार्यालय काठमाडौंले ठेकेदार कम्पनीलाई भने धमाधम पास वितरण गरिरहेको छ ।
ठूला आयोजनाको काम नरोक्ने भन्दै सडक विभागलगायतको सिफारिसमा निर्माण सेवा कम्पनीका सवारीलाई १ हप्ते पास वितरण गरेको पाइएको छ ।
काठमाडौंबाट दोलालघाटसम्म जाने अनुमति बोकेका ३ सयभन्दा बढी टिपर यतिबेला काभ्रेका गाउँगाउँ पुगेका छन् ।
जिल्ला प्रशासन कार्यालय काठमाडौंले जारी गरेको पास लिएर चालक र सहचालक पनौती, दोलालघाट हुँदै गाउँगाउँ गाडी लिएर घुमिरहेको स्थानीयवासीको आरोप छ ।
निर्माण ठेकेदार कम्पनीले सडक विभागको स्वामित्वको भन्दै ४ वैशाखदेखि लागूू हुने गरी टिपर चलाउने पास लिएका छन् । यो पास बोकेर उनीहरू गाउँगाउँ विना सुरक्षा, सावधानी घुमिरहेको भुम्लु गाउँपालिकाकी उपाध्यक्ष कल्पना श्रेष्ठ बताउँछिन् ।
काठमाडौं उपत्यकाबाट काभ्रेपलाञ्चोक भएर तराई तथा मध्यपहाडी जिल्ला जाने यात्रुलाई भने सम्बन्धित जिल्ला प्रशासन कार्यालय तथा सुरक्षा निकायले काठमाडौं नै फर्काइरहेका छन् ।
बिहीबारबाट काभ्रेमा दर्जनौँ टिपरले बालुवा बोक्न थाले पनि जिल्ला प्रशासन कार्यालयले रोकेको छैन । काठमाडौमा निर्माण सामग्री बालुवाको अभाव भएको भन्दै भुम्लु गाउँपालिकाको दोलालघाट क्षेत्रमा टिपर आउन थालेपछि स्थानीय त्रसित बनेका उपाध्यक्ष श्रेष्ठ बताउँछिन् ।
यसअघि सरकारले काठमाडौंमा दिउँसो टिपर गुड्न रोकेको थियो । त्यस समयमा सडक विभागले अनावश्यक पास वितरण गरेर दैनिक ३ सय गाडी दिउँसो गुडाउने गरेको थियो । अहिले पुन: लकडाउनको समयमा सोही सडक विभागले आर्थिक चलखेलमा परेर टिपर गुडाउन थालेको स्थानीयको आरोप छ ।
लकडाउनमा टिपर गुडाउन पाएवापत प्रति टिपर १ हजार रुपैयाँसम्मको कमिसनको चलखेल भएको उनीहरूको आरोप छ ।
‘कसैको स्वार्थका लागि गाउँपालिका जोखिम मोल्न तयार छैन । यस विषयमा हामीले माथिल्लो निकायमा जानकारी गराएका छौँ । लकडाउन अवधिभर हामी अब छिर्न दिँदैनौँ,’ उनले भनिन् ।
काभ्रेका प्रमुख जिल्ला अधिकारी श्रवण तिमल्सिना भने गृह मन्त्रालय तथा सडक विभागको निर्देशनअनुसार काम गरेको र आफूले टिपर चालकलाई सावधानी अपनाउन भनिसकेको बताउँछन् सिलापत्रबाट

प्रकशित मिति : ८ बैशाख २०७७, सोमबार ०८:३४