(यज्ञराज उपाध्याय) कैलालीको टीकापुरमा लकडाउनको उल्लंघन गर्दै पेट्रोल हाल्नेको भिडभाड लागेको छ । लामो समयपछि पम्पमा पेट्रोल आएपछि मानिसहरुको भिड निकै बाक्लिएलो हो ।
सरकारले पाचौं चरणमा लकडाउनको मिति सारेको भोलिपल्ट नै टीकापुरमा माहोल फरक बनेको छ । यो भिडभाडमा प्रहरी आफै मूकदर्शक बनेको देखिन्छ । नेपाल प्रहरी र सशस्त्र प्रहरीका अधिकारीहरु समेत भिडभाडको बीचमा भएता पनि सामाजिक दुरि कायम नगरी जम्मा भएको भिडलाई व्यवस्थापन गर्न सकेनन् ।
विश्वव्यापी महामारीको रुपमा फैलिएको नोबेल कोरोना भाइरस नेपालमा नियन्त्रण तथा रोकथाम गर्न गत चैत ११ गतेदेखि सरकारले लकडाउनको घोषणा गरेपछि देशभरकै माहोल शान्त थियो । गत बैशाख ३ गतेदेखि १५ गतेसम्म थप गरिएको लकडाउन आइतबार बसेको मन्त्रीपरिषद् बैठकले १० दिनका लागि १५ गतेदेखि २५ गतेसम्मका लागि थप गरेको हो । अहिले नेपालमा कोरोमा संक्रमित ५२ जना पत्ता लागेकोमा १६ जना सञ्चो भएर घर फर्किसकेका छन । अहिले नेपाल पनि कोरोनाको तेश्रो चरणमा पुग्ने संकेत देखिएको अवस्थामा प्रहरीले नै यसरी दिने छुटले जम्मा भएको भिडबाट धेरै खतरा हुने टीकापुरका सामाजिक व्यक्तित्वहरुको भनाई छ । उनीहरुले प्रहरीको यस्तो मनोमानीले नेपालमा कोरोनाको महामारी चरण सुरु हुन समय नलाग्ने बताएका छन् ।
ईलाका प्रहरी कार्यालय टीकापुरका प्रमुख मनोहर भट्टले लकडाउनको सबैले पालना गर्नुपर्ने बताउदै प्रहरीले कसैलाई लकडाउन उल्लंघन गर्ने छुट नदिएको बताए । उनले पेट्रोल हाल्नका लागि सोमबार बिहान २ घन्टाको समय दिएको तर भिड सोचेभन्दा धेरै र फरक किसिमले जम्मा भएको बताए । आकस्मिक कसैलाई पनि पेट्रोल चाहिन सक्ने भएकाले केही छुट दिइएको तर अनावश्यक रुपमा पेट्रोल हाल्नेहरु पनि जम्मा भएको र यसरी आकस्मिक बाहेक अन्यले पेट्रोल हालेको भए आवश्यक कदम अगाडी बढाइने बताए ।
