नेपाल भारत सिमा क्षेत्रबाट लुकीछिपी नागरिकहरु आवतजावत गरिरहेको खबर आइरहँदा दाङको नाका क्षेत्रबाट लकडाउनको समयमा कोही पनि नेपाल नभित्रिएको पाइएको छ । खुला सिमाना र जंगली क्षेत्र भएका कारण रातिको समयमा भारतबाट लुकिछिपी नेपाल भित्रिएको आशंका भइरहेको बेला सीमा क्षेत्रमा रहेका सुरक्षा निकायले दाङको नाका क्षेत्र पूर्णरुपले सुरक्षित रहेको बताएका हुन् । दाङका साना ठूला गरी जम्मा ३४ वटा नाकामध्ये प्रमुख नाकाहरुमा सुरक्षा पोस्ट राखेर नाका क्षेत्रलाई सिल गरिएको छ । कोरोना सङक्रमणसँगै अनावश्यक रुपमा नेपाल भित्रन नदिनको लागि दाङको डगमारा, भैसाही, भौवा, पटौली र खबरी नाकामा सशस्त्र प्रहरी खटाइएको छ । भारतीय सीमा सुरक्षाबल एसएसबिसँग समन्वय गरेर नेपाल भित्रने र नेपालबाट वाहिरिन सक्ने सम्भावित क्षेत्रमा कडा निगरानी राखिएको अस्थायी प्रहरी पोष्ट डगमाराका असई भूपेन्द्र खड्काले जानकारी दिनुभयो । उहाँले भन्नुभयो, ‘हाम्रो दाङको नाका क्षेत्रमा कुनै समस्या छैन । भारत आउन चाहने नेपालीहरु एकजना पनि यहाँ आएका छैनन् । भारतीय सुरक्षाकर्मीसँग पनि समन्वय भइरहेको छ ।’ दाङको सबै नाकामा बोर्डर आउट पोष्ट स्थापना भएको र सुरक्षा उपस्थिति राम्रो भएकाले आफूहरुले पनि नाका क्षेत्रमा सुरक्षाअनुभूति गरेको राजपुर गाउँपालिका वडा नम्बर ७ डगमाराका भीमबहादुर घर्तिले बताउनुभयो । यसैबीच दाङको नाका क्षेत्रमा थप ९ वटा बोर्डर आउट पोष्ट स्थापना गर्ने निर्णय भएकाले दाङको सबै नाकामा सुरक्षा उपस्थिति हुने दाङका प्रमुख जिल्ला अधिकारी गोविन्द रिजालले बताउनु भयो । प्रमुख जिल्ला अधिकारी रिलालले भन्नुभयो, ‘दाङको नाका क्षेत्र भौगोलिक हिसावले पनि विकट, जंगली क्षेत्र भएकाले समस्या भएपनि सुरक्षाको दृष्टिकोणले नाका अहिले पूर्ण सुरक्षित रहेका छ । रातदिन सुरक्षाकर्मीले गस्ती गरिरहेका छन् ।’ यसैबीच दाङको पूर्वमा धानखोला र पश्चिम सिमाना शिवखोलामा सिल हुने भएको छ । एम्बुलेन्स, अत्याबश्यक समान र राष्ट्रिय गौरवका योजनाका सामान बाहेक अन्य सबै सवारीसाधन आवतजावतमा रोक लगाइने भएको छ । दाङलार्ई कोरोना संक्रमणबाट बचाउन सकिने भन्दै लमही नगरपालिकाका प्रमुख कुलबहादुर केसीले सबैको सहयोग आबश्यक रहेको बताउनुभयो ।
