महेन्द्र सिंह
नेपालगञ्ज भारतको क्वारेन्टाइनमा रहेको नेपालीलाई ल्याउन थालिएको छ ।
भारतको बहराइच, नानपारा आसपासका क्वारेन्टाइनमा रहेका नेपालीलाई नेपालगञ्जमा ल्याउन थालिएको हो । भारतमा रहेका नेपालीलाई यता ल्याउदा बाँकेका क्वारेन्टाइनमा रहेका डेढ सय बढी भारतीयलाई पठाउने तयारी भएको छ । भारतबाट पाँच सय हाराहारीमा आउने आकलन गरिएको छ ।
बाँकेका प्रमुख जिल्ला अधिकारी कुमारबहादुर खड्काले भारतको क्वारेन्टाइनमा रहेका नेपालीलाई ल्याउने र बाँकेको क्वारेन्टाइनमा रहेका भारतीयलाई पठाउन थालेको जानकारी दिनुभयो । ‘केहीबेरमै उताका यता आउँछन् र यताका उता जान्छन्, प्रजिअ खड्काले भन्नुभयो, ल्याइसकेपछि कति आए थाहा हुन्छ ।’
भारतबाट क्वारेन्टाइनमा रहेका र नरहेका नेपालीहरु धमाधम गर्दै छोटी नाकाबाट नेपाल प्रवेश गरेपछि स्थानीय प्रशासनले मुख्य बाटोबाटै क्वारेन्टाइनमा रहेका नेपालीलाई भित्र्याउन थालेको हो । बाँकेको हवल्दापुरस्थित राम मावि र नेपालगञ्जको महेन्द्र बहुमुखी क्याम्पसलगायत ठाउँमा भारतीयलाई राखिएको छ । भारतबाट आउने नेपालीहरु बाँकेको मात्रै नभई अन्यत्र जिल्लाको समेत रहेकाले सम्बन्धित जिल्लासँग समन्वय गरेर अगाडि बढ्ने तयारी भएको छ ।
