एबिसी क्राइम ब्युरो
दाङ जेठ १८ तुलसीपुरमा युवक हत्या गर्ने चार जना अभियुक्तलाई प्रहरीले ४८ घण्टा नबित्दै सार्वजनिक गरेको छ । तुलसीपुर उपमहानगरपालिका–९ बेलुवामा कोठा भाडामा बस्दै आएका मन्दीप भुजको हत्यामा संलग्न तुलसीपुर–५ का २० वर्षिय आशिष नेपाली, २३ वर्षिय अजय बुढाथोकी , तुलसीपुर–१८ का २१ वर्षिय ओमबहादुर सार्की र अर्घाखाँची ढिकुरा–४ हाल तुलसीपुर–६ मा बस्दै आएका २३ वर्षिय शौरभ पोखरेलाई प्रहरीले सार्वजनिक गरेको हो ।
शुक्रबार बेलुका तुलसीपुर–९ को एक होटेलमा मादक पदार्थ सेवन गरेका मृतक भुजको साथीबाटै हत्या भएको हो । मृतक भुजले मादक पदार्थ सेवन पश्चात् गाँजा सेवन गर्न थालेपछि साथीभाइबिच विवाद भएको प्रहरीको अनुसन्धानबाट खुलेको हो ।
प्रहरीका अनुसार उनिहरुले मृतक भुजलाई धरिलो हतियार प्रहार गरी घाइते बनाएपछि टाउकोमा ढुंगा प्रहार गरेर हत्या गरेका हुन् । उनिहरुले करिब ४० मिटर पश्चिम उत्तर खोलामा ढुंगासमेत लुकाएको पाइएको इलाका प्रहरी कार्यालय तुलसीपुरका प्रमुख डिएसपी हरिहरनाथ योगीले बताउनुभयो ।
भुजको शब तुलसीपुर–५ को ज्ञानज्योति आधारभूत विद्यालयको पछाडीको खाली जग्गामा फेला परेको थियो । मृतक भुजका एक श्रीमती र एक छोरा रहेका छन् ।
