एबिसी संचार
क्वारेन्टाइनमै कुटिए स्वास्थ्यकर्मी
रौतहटको राजपुर नगरपालिकामा रहेको क्वारेन्टाइनमा रहेकाहरुले स्वास्थ्यकर्मीमाथि कुटपिट गरेका छन् ।
वडा नम्बर ९ बैरियास्थित मदरसामा रहेको क्वारेन्टाइनमा बसेकाहरुले आरडिटी टेष्ट गर्ने क्रममा दुईजना स्वास्थ्यकर्मीमाथि कुटपिट गरेका हुन् । कुटपिटबाट राजपुर नगरपालिकाका स्वास्थ्य शाखाका सहसंयोजक सिनियर अहेब शेख खुसैद र स्वास्थ्यकर्मी राम नरेश साह घाइते भएका हुन् । उनीहरुको टाउकोमा चोट लागेको नगरपालिकाका स्वास्थ्य शाखा संयोजक रविन्द्र झाले जानकारी दिए ।
उक्त क्वारेन्टाइनमा रहेका मध्ये १८४ जनाको पिसिआर रिपोर्ट नेगेटिभ आएपछि उनीहरुलाई आरडिटी टेष्ट गरिएको थियो । आरडिटी टेष्ट गर्दा निगेटिभ आएकाहरुलाई मात्रै घर पठाउने निर्णय भएअनुसार परीक्षण शुरु गरेको र केही व्यक्तिको रिर्पोट पोजेटिभ आएपछि स्वास्थ्यकर्मीमाथि एक्कासी आक्रमण गरेको स्वास्थ्य संयोजक झाले बताए ।
क्वारेन्टाइनको माथिल्लो तलामा ७३ जना कोरोना भाइरस संक्रमित रहेका छन् । पिसिआर रिपोर्ट नेगेटीभ आएपछि आफूहरु घर जान पाउनुपर्ने क्वारेन्टाइनमा बस्नेहरुको माग छ । स्वास्थ्यकर्मीमाथि हातपात गर्नेहरुले तीनवटा मोटरसाइकल समेत तोडफोड गरेको राजपुर नगरपालिकाका प्रमुख प्रशासकीय अधिकृत बैजु ठाकुरले बताए । नागरिकखबरबाट
