महेन्द्र सिंह
बाँके जेठ २२ गुणस्तरहिन मासु बेच्ने फ्रेस हाउसलाई कारवाही
नेपालगन्जमा बुधबार मासु पसलहरुको अनुगमन गरिएको छ । अनुगमनका क्रममा कुखुराको अखाद्य (गुणस्तरहिन) मासु बेचेको भेटिएपछि नेपालगन्ज धम्बोझीको सगरमाथा फ्रेस एण्ड पोल्ट्री सप्लायर्सलाई कारबाही गरीएको बाणिज्य, आपूर्ति तथा उपभोक्ता संरक्षण कार्यालय बाँकेका प्रमुख कृष्ण प्रसाद पौड्यालले जानकारी दिए ।
पौड्यालको नेतृत्वमा खटिएको बजार अनुगमन टोलीले फ्रिजमा धेरै दिन राखेर कालो भईसकेको कुखुराको मासु फेला पारेपछि उक्त फ्रेस हाउसलाई २० हजार रुपौयाँ जरिवाना तिराएको छ । साथै फ्रेस हाउसमा रहेको ८ हजार मुल्य बराबरको २५ किलो अखाद्य मासु नियन्त्रणमा लिई नष्ट गरिएको पौड्यालले जानकारी दिए ।
कार्यालयले पछिल्लो समयमा बजार अनुगमनलाई तिब्रता दिएको छ । अनुगमनका क्रममा अन्य फ्रेस हाउसलाई मृल्य बृद्धि नगर्न र मापदण्ड अनुसार ब्यवसाय संचालन गर्न निर्देशन दिईएको पौड्यालले बताए ।
बाणिज्य, आपूर्ति तथा उपभोक्ता संरक्षण कार्यालयको नेतृत्वमा गरीएको अनुगमनमा जिल्ला प्रशासन कार्यालय बाँकेका प्रतिनिधि, नेपालगन्ज उपमहानगरपालिकाका प्रतिनिधि, भेटनरी अस्पतालका प्रतिनिधि, खाद्य तथा गुण नियन्त्रण कार्यालयका प्रतिनिधि लगाएतको सहभागीता रहेको थियो ।
