एबिसी संचार दाङ जिल्लाको विभिन्न खोला तथा नदिहरुमा उत्खनन् क्षेत्रमा चार किल्ला समेत निर्धारण नगरि हचुवाको भरमा मापदण्ड विपरित ढुंगाजन्य बस्तुहरुको उत्खनन् गरिएको पाईएको हो ।
जिल्ला समन्वय समिति दाङले घोराहीमा पत्रकार सम्मेलन गरि खोला तथा नदिहरुबाट मापदण्ड विपरित उत्खनन् भएका ढुंगाजन्य बस्तुहरु निर्माण कार्यमा नभई क्रसर उद्योगमा लगेको फेला परेको जनाएको छ । समितिका उपप्रमुख श्रीधर शर्मा पौडेलले तुलसीपुर उपमहानगरपालिका, लमही नगरपालिका, बबई, दंगिशरण, राप्ती र गढवा गाउँपालिकाका विभिन्न खोलाहरुमा अबैधरुपमा उत्खनन्, निकासी र मनपरि मेसिनरी यन्त्रहरुको प्रयोग भएको जानकारी दिए ।
त्यसैगरी, घोराही तुलसीपुर फोर लेन सडकमा प्रयोग हुने ग्राभेल ग्वारखोलाबाट उत्खनन् गरि सम्बन्धित निर्माण कार्यमा प्रयोग नगरि क्रसर उद्योगमा लगेको र बाताबरणिय प्रभाव मूल्याङकन नगरिएको क्षेत्रबाट उत्खनन् गरेको पाईएको उनले जानकारी दिए । साथै ढुंगाजन्य बस्तुहरुको उत्खनन् र निकासीका लागि स्थानिय तहहरुलाई जिम्मा दिए पनि अपेक्षा अनुसार काम गर्न नसकेको अनुगमनबाट फेला परेको समन्वय समितिले जनाएको छ ।
विकास निर्माणको काम भनेर अनुमती लिने तर क्रसर उद्योगमा पु¥याउने र जथाभावीरुपमा उत्खनन् गर्ने गरेको उपप्रमुख पौडेलले बताए । यसैविच समन्वय समितिले आगामी असार १ गते देखी असोज १ गते सम्मका लागि दाङमा नदिजन्य पदार्थको उत्खनन र निकासी पूर्णरुपमा रोक लगाईएको पत्रकार सम्मेलनमा जानकारी दिएको छ । साथै कोरोना संक्रमणका कारण पूर्वाधार विकासका कामहरु प्रभावकारीरुपले अघि बढ्न नसकेको समेत निष्कर्ष निकालेको छ ।
यसैगरी, स्थानिय तहहरुले कोरोना संक्रमण रोकथाम र राहतको कामलाई प्रभावकारी ढंगले अघि बढाएको समेत समितिले जनाएको छ । पत्रकार सम्मेलनमा समन्वय समितिका प्रमुख जितेन्द्रमान नेपालीले नदिजन्य बस्तुहरुको सहि ढंगले उत्खनन् र प्रयोगमा ल्याउन स्थानिय तहहरुले नै अनुगमनलाई प्रभावकारी बनाउनु पर्ने बताए । पहुँच हुनेहरु नै नदिजन्य बस्तुहरुको दोहनमा सकृय रहेको भन्दै उहाँले मनपरि भैरहेको उत्खनन्लाई रोक्न स्थानिय तहहरुलाई निर्देशन दिएको समेत उनले जानकारी दिए ।
