एबिसी संचार
मेलम्ची सिन्धुपाल्चोकको इन्द्रावती गाउँपालिकाकाका जनप्रतिनिधिले कोरोना भाइरसको बीमा धमाधम गर्न थालेका छन् ।
स्थानीय सरकारका जनप्रतिनिधिले जनतासंँग प्रत्यक्ष रुपमा घुलमिल रहने भएकाले कोभिड १९ सङ्क्रमणको खतरा हुने जनाउँदै उनीहरुले कोरोना बीमा धमाधम गर्न थालेका हुन् । गाउँपालिकाका अध्यक्ष वंशलाल तामाङको व्यक्तिगत खर्चमा यहाँका ५७ जनप्रतिनिधि तथा गाउँपालिकाको कोरोना कोषबाट ७२ कर्मचारीको रु एक लाखको कोरोना बीमा गराएको गाउँपालिकाले जनाएको छ ।
कोरोना सङ्क्रमण नियन्त्रण तथा रोकथामका लागि अग्रपङ्क्तिमा खटिएका जनप्रतिनिधि र कर्मचारीको मनोबल उच्च बनाइराख्न उनीहरुको बीमा गरेको अध्यक्ष तामाङले बताउनुभयो ।
आइएमई जनरल इन्स्योरेन्समा कर्मचारी र जनप्रतिनिधि गरी १२९ जनाको रु एक लाखबराबरको एक वर्ष अवधिको बीमा गरेको अध्यक्ष वंशलाल तामाङले जानकारी दिनुभयो । वडा नं १० का जनप्रतिनिधिको भने वडाध्यक्ष जीवन थापामगरले बीमा गरिसक्नुभएको छ ।
खानेपानी योजना सम्पन्न गर्न समस्या
कोरोना भाइरस (कोभिड–१९) सङ्क्रमण रोकथाम तथा नियन्त्रणका लागि सरकारले मुलुकभर लागू गरेको बन्दाबन्दीका कारण सिन्धुपाल्चोकको विकास निर्माणको कार्यमा प्रत्यक्ष असर परेको छ ।
बहुचर्चित मेलम्ची खानेपानी आयोजनाको प्रभावित क्षेत्रमा बन्दाबन्दीका कारण यो आर्थिक वर्षमा सम्पन्न हुने खानेपानी योजनाका काम प्रभावित भएको हो । खानेपानी मन्त्रालयले यस क्षेत्रको खानेपानीको सहज आपूर्तिका लागि चालू आवमा मात्रै रु ६ करोडभन्दा बढी रकम विनियोजन गरेको थियो । खानेपानी मन्त्री बीना मगरसँग पूर्वमन्त्रीसमेत रहनुभएका प्रतिनिधिसभा क्षेत्र नं २ का सांसद शेरबहादुर तामाङले यस क्षेत्रका स्थानीयवासीको खानेपानी आपूर्ति सहज बनाएरमात्रै मेलम्चीलाई काठमाडौँ लैजानका लागि आग्रह गर्नुभएकोे थियो ।
खानेपानी मन्त्रालयबाट मेलम्ची खानेपानी आयोजना प्रभावित क्षेत्रमा गत वर्ष मेलम्ची खानेपानी आयोजनामार्फत ६३ वटा आयोजनाको डिपिआर सम्पन्न भई २४ वटा आयोजना शुरु भएको छ । तर बन्दाबन्दीका कारण उक्त योजना सम्पन्न हुन ढिलाइ भएको सांसद शेरबहादुर तामाङले जानकारी दिनुभयो ।
सङ्घीय खानेपानी तथा ढल व्यवस्थापन आयोजना, हेटौँडाका कामु आयोजना प्रमुख मोहनलाल जैसीले प्रभावित क्षेत्रका आयोजनालाई उच्च प्राथमिकतामा राखिएकाले सकेसम्म समयमै सम्पन्न गरिने जानकारी दिनुभयो । प्रभावित क्षेत्रका ४९ आयोजनामध्ये पुराना र नयाँ गरी करिब २० आयोजनाको सम्झौता सम्पन्न भएका र बाँकी आयोजनाका लागि पाइप र फिटिङ्सको बोलपत्र प्रक्रियामा गएको छ ।
मेलम्ची खानेपानी प्रभावित क्षेत्रमा आगामी वर्षका लागि ९० भन्दा बढी खानेपानी योजना प्रस्ताव गरिएको र सन् २०२२ सम्ममा प्रभावित क्षेत्रमा गुणस्तरीय खानेपानी वितरण कार्य सम्पन्न गर्न पहल भइरहेको सांसद तामाङले बताउनुभयो । रासस

सम्बन्धित

दाङ प्रहरीले लकडाउन उल्लंघन गर्ने ४३६ जना ब्यक्ती कार्वाही

राजीनामा दिँदै नेपाल र खनाल पक्षका सबै सांसदहरु

खानेतेलको मूल्य ८० प्रतिशतसम्म बढाइयो जनता मारमा

बर्दिया प्रहरीले शनिबार निषेधाज्ञा अवज्ञा गर्ने ७० जनालाई कार्वाही

लकडाउनको मौका छोपि सितगंगामा ठेकेदारलाई चुरे दोहनको अनुमती दियो ?

एसपी अधिकारीद्धारा २६ वटा अक्सिजन अस्पताललाई हस्तान्तरण