एबिसी संचार
भैरहवा, जेठ ३२ गते । रुपन्देहीको बेलहिया नाका भएर जेठ महिनाभरमा १८ हजार ४९१ जना नेपाली नेपाल भित्रिएका छन् । त्यस्तै, यही नाकाबाट जेठ भएर भारत प्रवेश गर्नेको सङ्ख्या २३ हजार ६४२ रहेको इलाका प्रहरी कार्यालय, बेलहियाले जनाएको छ ।
जेठको अन्तिम दिन आइतबार मात्रै ६७६ जना नेपाली नेपाल भित्रिएका छन् भने ६११ जना भारतीय नागरिक भारत प्रवेश गरेको इलाका प्रहरी कार्यालय, बेलहियाले जानकारी दिएको छ । कोरोना महामारीका कारण भारतमा कामविहीन बनेका नेपालीहरू फर्कने क्रम जारी रहेको बेलहियाका प्रहरी निरीक्षक इश्वरी अधिकारीले बताउनुभयो ।
प्रहरी निरीक्षक अधिकारीका अनुसार नेपाल आएका नेपालीमध्ये अधिकांश आआफ्नो जिल्लामा पुगेर सम्बन्धित स्थानीय तहले व्यवस्थापन गरेका क्वारेन्टाइनमा बसेका छन् भने कतिपयलाई होम क्वारेन्टाइनमा पनि पठाउने गरिएको छ ।
बेलहिया प्रहरीका अनुसार यो नाकाबाट भित्रिएका अधिकांश रुपन्देही, पाल्पा, गुल्मी, अर्घाखाँची, नवलपरासी, स्याङ्जा, कपिलवस्तु, पोखरा, बाग्लुङ्लगायत जिल्लाका रहेका छन् । बेलहिया नाका भएर भित्रिएका सबैलाई सम्बन्धित पालिकाको समन्वयमा गन्तव्यमा पठाइएको प्रहरी निरीक्षक अधिकारीले जानकारी दिनुभयो ।
प्रदेश ५ मा बेलहिया नाका भएर सबैभन्दा धेरै नागरिक ओहोरदोहोर गर्छन् । प्रदेश ५ भरि अहिलेसम्म २० हजार ५५९ को कोरोना परीक्षण भएको छ । प्रदेश स्वास्थ्य निर्देशनालयका अनुसार २७ हजार ७४१ को स्वाब सङ्कलन गरिएकोमा सात हजार १८३ जनाको रिपोर्ट आउन बाँकी छ । प्रदेश ५ मा अहिलेसम्म एक हजार ५१९ काेराेना सङ्क्रमित भेटिएका छन् भने ५४६ जना निको भएर घर फर्केका छन् । हाल ९६७ जनाको उपचार जारी छ भने सात जनाको मृत्यु भएको छ ।
भारतका विभिन्न ठाउँमा रोजगारीका लागि गएका नेपालीहरू रेल तथा सार्वजनिक बसका माध्यमबाट सुनौली नाकासम्म आउने गरेको र आपसी समन्वयमा नेपाल ल्याउने गरिएको प्रहरीको भनाइ छ ।गोर्खापत्रबाट

सम्बन्धित

उपराष्ट्रपति पासाङलाई उपत्यका भाइर जाननदिन निर्देशन

राष्ट्रिय परीक्षा बोर्डले जेठको तेस्रो साता एसईई परीक्षाको तयारी

देशभरको सुरक्षामा उच्च सतर्कता ठाँउमा व्यापक सुरक्षाकर्मीहरु

विमानस्थलबाट २६ हजार अमेरिकी डलरसहित बेलायती नागरिक पक्राउ

प्रहरीको थुनुवामै मृत्यु नन्दलालको शव ३ दिनपछि परिवारले बुझे

गुडीरहेको ट्याम्पुमा एक्कासी आगलागी यात्रुहरु सुरक्षित