महेन्द्र सिंह
जिल्ला प्रहरी कार्यालय बाँकेका प्रहरी प्रमुख एसपी ओमबहादुर रानाले अपराधिक क्रियाकलाप उपर कानूनी कठोरता चालिने चेतावनी दिनुभएको छ । जिल्ला प्रहरी कार्यालय बाँकेको जिम्मेवारी सम्हालेपछि सोमबार आयोजित पत्रकार अन्तरक्रिया कार्यक्रममा उहाँले अपराध नियन्त्रणका लागि बिवेकपूर्ण प्रहार गरिने चेतावनी दिनुभएको हो ।
१७ बुँदे प्रतिबद्धता सार्वजनिक गर्दै उहाँले हरेक नागरिकलाई छिटो, छरितो, सरल, समान र नागरिकमुखी सेवा प्रवाहमा जोड दिइने प्रतिबद्धता जनाउनुभएको छ । खुल्ला सीमा नाकाबाट हुने सीमा अपराध, चोरी निकासी तथा पैठाी नियन्त्रण, घरेलु मदिरा, यौन व्यवसाय, जुवातास, लुटपाट र कालोबजारी नियन्त्रण गर्ने पनि उहाँले आफ्नो प्रतिबद्धता पत्रमा उल्लेख गर्नुभएको छ ।
संठगित अपराध तथा गुण्डागर्दी, सीमा अपराध, प्राकृतिक श्रोतको दोहन गर्ने माथि निर्मम प्रहार गरिने एसपीका प्रतिबद्धता छन् । बाँकेमा लागु औषध दुव्र्यसनी तथा ओसारपसार चुनौतिका रुपमा रहेको भन्दै उहाँले त्यसको नियन्त्रणका लागि प्रहरी प्रतिबद्ध रहेको पनि उहाँको भनाइ छ ।
