महेन्द्र सिंह जिल्ला स्वास्थ्य कार्यालय बाँकेका अधिकृत एवं कोरोनाका फोकलपर्सन नरेश श्रेष्ठका अनुसार, कोहलपुरको पिपरीबाट चार, क्यान्सर अस्पतालबाट दुई र राप्तीसोनारीको सर्रीबाट ६ जना डिस्चार्ज भएका छन् । उहाँका अनुसार, आज नै घर जाने अरुको पनि प्रक्रिया थालिएको छ । उनीहरु पनि घर जान सक्छन् ।
कोरोना देखिएपछि आइसोलेसन सेन्टरमा बसेर १४ दिन बिताएकालाई घर पठाउने गरिएको छ । त्यस्तामा यो अवधिमा कुनै लक्षण देखिनु हुँदैन । लक्षण नदेखिएपछि उसले कोरोना जितेको मानिने गरिएको छ ।
बाँकेमा हालसम्म २ सय ८० जनाले कोरोना जितेका छन् । तीन सय ५० जना संक्रमित हुँदा २ सय ८० जना घर फर्किएका हुन् । दुई जनाको मृत्यु भएको छ । बाँके अहिले क्वारेन्टाइमा एक हजार एक सय ४५ जना रहेका छन् । आइसोलसनमा ७५ जना रहेका छन् । अहिलेसम्म बाँकेमा ६ हजार ५ सय ८८ जनाको पीसीआर र ७ हजार ८ सय ७० जनाको आरडीटी जाँच भएको छ ।
