प्रकशित मिति : ५ श्रावण २०७७, सोमबार १७:३५

मनोज डागी
जिल्ला विपद् व्यवस्थापन समितिको आइतबार बसेको बैठकले आठबीसकोट नगरपालिका ३ रेझेखोलामा पहिरोमा परी ज्यान गुमाउने दुई जना र सोही वडाको स्यालाखदीमा आगलागिमा ज्यान गुमाउनेका परिवारलाई राहात उपलब्ध गराउने निर्णय गरेको हो ।
गत जेठ ३ गते स्यालाखदीमा डण्डे बोहराको घरमा आगलागि हुँदा ३६ वर्षिया श्रीमति लाली बोहराको मृत्यु भएको थियो । त्यस्तै असार २६ गते रेझेखोलामा तुलवहादुर दमाईको घर पहिरोले पुर्दा उहाँकी श्रीमति २८ वर्षिया सीता दमाई र छोरा ६ वर्षिय हाविल परियारको मृत्यु भएको थियो ।
प्रकोप पीडित उद्धार र राहत सम्बन्धी मापदण्ड (छैटौं संशोधन) २०७४ अनुसार प्रति मृतक एक लाखका दरले राहात उपलब्ध गराउने निर्णय भएको जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी उपेन्द्रराज पौडेलले जानकारी दिनुभयो ।
त्यस्तै बैठकले बाढी र पहिरोका कारण उच्च जोखिममा रहेका ठाउँका नागरिकलाई अस्थायी रुपमा स्थानान्तरण गर्नुपर्ने अवस्था आएमा स्थानीय तहको समन्वय र सहकार्यमा जिल्ला विपद् व्यवस्थापन समितिको निर्णय अनुसार सुरक्षित ठाउँमा सार्ने निर्णय गरेको छ ।
जिल्ला प्रशासन कार्यालयमा बसेको बैठकले हालसम्म जिल्लामा बाढी र पहिरोका कारण पूर्णरुपमा घर क्षति भएका २४ परिवारलाई प्रदान गरिएको राहत रकम दुई लाख १८ हजार रुपैंयालाई अनुमोदन पनि गरेको छ । समितिको सिफारीसमा खानेपानी, सिंचाई तथा उर्जा विकास कार्यालयबाट प्रदान गरिएको तीन सय ३३ थान तारजालीलाई समेत बैठकले अनुमोदन गरेको छ ।
पछिल्लो समय जिल्लामा आंशिक रुपमा भित्रिएको सलह किराले क्षेति गरिरहेकाले यसको रोकथाम र नियन्त्रणका लागि सरोकारवाला विचमा समन्वय बढाई प्रभावकारी रुपमा खट्ने, खटाउने र कोभिड–१९ का कारण जिल्लामा विदेशबाट फर्किनेहरुको संख्या उल्लेख्य रहेकाले तिनिहरुको निगरानी गरी प्रभावकारी व्यवस्थापन गर्ने र सोही अनुसार सुरक्षा व्यवस्था मिलाउन आवश्यक समन्वय र सहजिकरण गर्ने पनि निर्णय भएको प्रमुख जिल्ला अधिकारी पौडेलको भनाई छ ।


सम्बन्धित

दर्ता विवरण

सूचना विभाग दर्ता नंः १३२५/०७५/७६

Twitter

Contact

सम्पादक – नुकेन्द्र प्रताप सिंह-
सम्पर्क-9848262615
संचालक – सागर थापा
सम्पर्क – 9847845918
email- [email protected]

Copyright © 2015-2021 AbcSanchar.com