एबिसी संचार
काठमाडौं प्रहरी उपरीक्षक (एसपी) सोमेन्द्रसिंह राठौर महानगरीय प्रहरी परिसर काठमाडौँको प्रवक्ता/सुचना अधिकारी तोकिएका छन् ।
महानगरीय प्रहरी परिसर काठमाडौं तथा मातहतका युनिटले गरेको काम कारवाहीलाई तथ्यगत रुपमा सम्प्रेषण गर्नका लागि एसपी राठौरलाई प्रवक्ता तथा सुचना अधिकारीको जिम्मेवारी दिइएको हो ।
छ महिना अगाडी पर्सा प्रहरी प्रमुखको जिम्मेवारीबाट काठमाडौँ परिसरमा सरुवा भएका राठौर अपराध अनुसन्धान, कमाण्ड कन्ट्रोल र अप्रेशनमा अब्बल मानिन्छन् । एसपी राठौरसँग लामो समय काठमाडौँ उपत्यकामा बसेर ‘पुलिसिङ’ गरेको अनुभव छ ।
आक्रामक ‘पुलिसिङ’ गर्नुपर्छ भन्ने मान्यता राख्ने एसपी राठौर नेपाल प्रहरीमा इमानदार र व्यावसायिक अधिकृतको रुपमा परिचित छन् । प्रहरी प्रधान कार्यालय स्रोतका अनुसार एसपी राठौरलाई आगामी भदौको सरुवामा रुपन्देही प्रहरी प्रमुखको जिम्मेवारी दिने बिषयमा समेत छलफल भएको बुझिएको छ ।
यसअघि काठमाडौं प्रहरी प्रवक्ता रहेका डीएसपी राजकुमार केसीलाई हटाएर एसपी राठौरलाई जिम्मेवारी दिइएको बताइएको छ ।
एसपी राठौरलाई मोबाइल नम्बर ९८५१११५०७७ मा सम्पर्क गर्न सकिने पनि महानगरीय प्रहरी परिसर काठमाडौंले जनाएको छ ।
