दाङमा बेलुकी ७ बजेदेखि बिहान ५ बजेसम्म कर्फ्यु जारी

प्रकशित मिति : १ भाद्र २०७७, सोमबार १५:०४

सागर थापा
दाङमा कोरोना संक्रमण रोकथामका लागि दाङमा आजदेखि साँझको समयमा कफ्र्यु आदेश जारी गरिएको छ । लकडाउन खुलेपश्चात कोरोना समुदायस्तरमा फैलने खतरा बढेपछि स्थानीय प्रशासनले आजदेखि साँझको समयमा कफ्र्यु आदेश जारी गरेको हो ।
प्रशासनले आजदेखी ८ गते सम्म बेलुका ७ बजे देखी विहान ५ बजे सम्म पसल तथा यातायात सबै बन्द हुने भएका छन् । जिल्ला संकट व्यवस्थापन केन्द्रको साउन ३० गते बसेको वैठकले यही आजदेखि ८ गतेसम्म साँझ ७ बजेदेखि विहान ५ बजेसम्मका लागि निशेधाज्ञा जारी गरेको हो ।
आजदेखि रातको समयमा बजार, यातायात, हिँडडुलमा समेत पूर्णरुपले बन्देज लगाइएको जिल्ला संकट व्यवस्थापन केन्द्रका संयोजक तथा प्रमुख जिल्ला अधिकारी गोविन्दप्रसाद रिजालले जानकारी दिनुभयो ।
यस्तै चाडपर्वको नाममा समाजमा बढि रहेको भिडभाडलाई कम गर्नका लागि जतिसुकै समयमा हुने नाँचगान, भेला, गोष्ठी, सेमिनार, कार्यक्रमलाई पूर्णरुपले रोक लगाएको उहाँले बताउनुभयो ।
केन्द्रको वैठकले बजारलाई व्यवस्थित गर्न अनिवार्यरुपमा स्वास्थ्य सामग्री प्रयोग गर्ने, भौतिक दुरी कायम गर्ने, माइकिङ लगायतका कार्यहरु गर्ने, यातायात क्षेत्रलाई पनि व्यवस्थितरुपमा सञ्चालन गराउने निर्णय गरेको छ ।
यसैबिच कोरोनाको सङ्क्रमण बढ्दै गएपछि अहिलेसम्म देशका ४१ जिल्लाका विभिन्न ठाउँमा निषेधाज्ञा, लकडाउन, सिल र अत्यावश्यक बाहेकका सेवा बन्द भएका छन् ।
सरकारले अवस्था हेरेर लकडाउन गर्ने वा खोल्ने अधिकार सम्बन्धित जिल्ला र पालिकालाई दिएसँगै विभिन्न ठाउँमा निषेधाज्ञा, लकडाउन, सिल र अत्यावश्यक बाहेकका सेवा बन्द भएका हुन् ।

प्रकशित मिति : १ भाद्र २०७७, सोमबार १५:०४