दाङमा ३७ जनामा कोरोना संक्रमण पुष्टि

प्रकशित मिति : २१ भाद्र २०७७, आईतवार ०७:००

सागर थापा राप्ती स्वास्थ्य विज्ञान प्रतिष्ठान घोराही दाङमा गरिएको स्वाब परिक्षणमा ३७ जनाको रिपोर्ट पोजिटिभ आएको स्वास्थ्य कार्यालय दाङले जनाएको छ । समुदाय स्तरमा कोरोना देखिएपछि विभिन्न ठाउँबाट संकलित स्वाब परिक्षण गर्ने काम भइरहेको छ । घोराही उपमहानगरका विभिन्न वडा, नारायणपुर क्षेत्र, जिल्ला प्रशासन कार्यालय, तुलसीपुर उपमहानगरपालिकाका विभिन्न वडाहरुबाट संकलन गरिएको कुल ४ सय ४ वटा स्वाब परिक्षण गर्दा ३७ जनामा कोरोना पुष्टि भएको छ भने बाँकी ३६७ जनाको रिपोर्ट नेगटिभ आएको छ । आज परिक्षण गरिएका स्वाब यस अघि कोरोना संक्रमण पुष्टि भएका स्थानबाट कन्ट्याक्ट ट्रेसिङ गरेर स्वाब संकलन गरिएको थियो ।
संक्रमित हुनेमा घोराही उपमहानगरपालिकाका १८ जना रहेका छन् । जस अनुसार वडा नम्बर ६ का १ जना, वडा नम्बर १० का ९ जना, वडा नम्बर ११ का ४ जना, वडा नम्बर १५ का ४ जना रहेका छन् । संक्रमित हुनेमा १० जना पुरुष रहेका छन् भने ८ जना महिला रहेका छन् । तीमध्ये ७ जना जिल्ला प्रशासन कार्यालयबाट संकलित स्वाब परिक्षण गर्दा कोरोना पुष्टि भएका व्यक्ति हुन् ।
यसैगरी तुलसीपुर क्षेत्रबाट संकलन गरि गरिएको स्वाब परिक्षणमा ९ महिने शिशुसहित १८ जनामा कोरोना देखिएको छ । जस अनुसार तुलसीपुर उपमहानगरपालिका वडा नम्बर १ बाट १ जना, वडा नम्बर ५ बाट ४ जना, वडा नम्बर ६ बाट ४ जना, वडा नम्बर ७ बाट २ जना, वडा नम्बर ८ बाट १ जना, वडा नम्बर १७ बाट १ जना, वडा नम्बर १८ बाट २ जना र वडा नम्बर १९ बाट ३ जनामा कोरोना देखिएको छ । यस्तै, जिल्लाको शान्तिनगर गाउँपालिका वडा नम्बर ५ का १ जनामा पनि कोरोना देखिएको स्वास्थ्य कार्यालयले जनाएको छ । यो सँगै जिल्लामा कोरोना संक्रमितको कुल संख्या ८ सय ३८ पुगेको छ । ती मध्ये ७ सय ६ जना उपचारपछि निको भई डिस्चार्ज भईसकेका छन् । बाँकी ९३ जनाको विभिन्न आइसोलेसनमा उपचार भइरहेको छ ।
यसैबीच, आज संक्रमण पुष्टि भएकाहरुलाई कोरोना विशेष आइसोलेसनमा पठाउने या होम आइसोलेसनमा राखेर उपचार गर्ने भन्ने तय हुन लागेको घोराही उपमहानगर स्वास्थ्य शाखा प्रमुख नारायणप्रसाद घर्तीले जानकारी दिए । उता, तुलसीपुर उपमहानगरमा कोरोना पुष्टि भएकाहरुलाई कोरोना विशेष अस्पताल बेलझुण्डी लैजाने तयारी भएको तुलसीपुर उपमहानगर कोरोना फोकल पर्सन विमल केसीले जानकारी दिए ।
यसैबीच, अहिले बबई गाउँपालिका र बंगलाचुली गाउँपालिकामा सक्रिय कोरोना संक्रमित संख्या शुन्य रहेको छ । समुदाय स्तरमा कोरोना संक्रमण देखिएपछि कोरोना परिक्षणको दायरा बढाइएको स्थानीय तहहरूले जनाएका छन् । समुदाय स्तरमा कोरोना संक्रमणको जोखिम थप गहिरिन नदिन स्थानीय प्रशासनले भदौ २१ गते राति १२ बजेसम्म जिल्लाभर पूर्ण रूपमा निषेधाज्ञा लागु गरेको छ ।
पूर्णकालीन निषेधाज्ञाको समयावधि भोलि राति १२ बजेपछि सकिँदैछ । निषेधाज्ञा हटाउने या लम्ब्याउने भन्ने विषयमा भोलि आइतबार बस्ने बैठकबाट टुंगो लाग्ने बताइएको छ । प्रमुख जिल्ला अधिकारी गोविन्द प्रसाद रिजालले भोलि बिहान डाकिएको कोरोना संकट व्यवस्थापन समितिको बैठकबाट के गर्ने भन्ने निर्णय गरिने जानकारी दिए ।

प्रकशित मिति : २१ भाद्र २०७७, आईतवार ०७:००