काठमाडौंमा नक्कली सुन बरामद प्रकरणमा २ जना गहना व्यवसायी पक्राउ

प्रकशित मिति : २४ भाद्र २०७७, बुधबार १५:०४

ABC Sanchar
काठमाडौं गत साउन १३ गते काठमाडौंको कमलादीबाट साढे १४ किलो नक्कली सुन (चाँदी) र आधा किलो सुन बरामद पक्ररणमा प्रहरीले थप २ जनालाई पक्राउ गरेको छ ।
पक्राउ पर्नेहरु काठामाडौंको न्यूरोड क्षेत्रमा सुनचाँदीको व्यवसाय गर्दै आएका व्यापारी हुन् । महानगरीय प्रहरी परिसर काठामाडौंका अनुसार नक्कली सुन बरामद प्रकरणमा न्यूरोडमा रहेको लक्की ज्वेलर्सका श्रीनिवास उपाध्याय र अष्टमंगल ज्वेलर्सका विजय ताम्राकारलाई पक्राउ गरिएको हो ।
उनीहरुलाई भदौ १५ गते नै पक्राउ गरिएको प्रहरी स्रोतले जानकारी दिएको छ ।
गत साउन गते काठमाडौंको कमलादीबाट १५ किलो सुनजस्तो देखिने पहेँलो धातु प्रहरीले बरामद गरेको थियो । बरामद गरिएको धातु परीक्षण गर्दा आधा किलो माात्रै सक्कली सुन निस्किएको थियो भने साढे १४ किलो चाँदी निस्किएको थियो ।
प्रहरीका अनुसार उक्त आधा किलो सुन तस्करहरुले लक्की ज्वेलर्सका श्रीनिवास उपाध्यायसँग किनेका थिए । श्रीनिवास उउपाध्याले उक्त सुन अष्टमंगल ज्वेलर्सका विजय ताम्राकारसँग किनेका थिए ।
अष्टमंगल ज्वेलर्सका विजय ताम्राकारले भने उक्त सुन राष्ट्र बैंकबाट किनेका थिए ।
राष्ट्र बैंकबाट किनेको सुन नेपालमा गहनाको रुपमा मात्रै बिक्री गर्न पाइन्छ । तर, ताम्राकारले ढिक्काको रुपमा उपाध्याय र उपाध्यायले तस्करहरुलाई बिक्री गरेको पाइएपछि प्रहरीले उनीहरु दुवैजनालाई पक्राउ गरेको हो ।
तस्करहरुले चाँदीको ढिक्कामा सुनको लेपन लगाएर सुन नै हो भनेर १५ किलो बिक्री गर्न लागेका थिए ।
त्यस प्रकरणमा प्रहरीले चाँदीमा सुनको लेपन लगाउनेदेखि तस्करी गर्नेसम्मलाई पक्राउ गरिसकेको छ ।
पक्राउ परेकाहरुविरुद्ध संगठित अपराधको कसुरमा अनुसन्धान भइरहेको प्रहरीले जानकारी दिएको छ ।
प्रहरीले कमलादीबाट नक्कली सुनसहित २ थान पेस्तोल समेत बरामद गरेको थियो ।
उक्त प्रकरणमा प्रहरीले तस्करहरु इल्ताफ हुसेन अन्सारी, निलेश शाखिया, कौशल पटेल, देवानसिंह पटेल, विजय पटेल, प्रहरी जवाान प्रसन्न श्रेष्ठ, प्रहरी जवान प्रसन्नका घरधनी उमेश श्रेष्ठ, प्रहरी जवान बहादुरसिंह कडायत र चाँदीमा सुनको जलप लगाउने मनिषलाई पक्राउ गरिसकेको छ ।