महेन्द्र सिंह नेपालगन्ज भन्सार कार्यालयबाट आलुको भन्सार गराएर भारतबाट नेपालतिर अबैध प्याज तस्करी गर्ने ट्रक पक्राउ
बाँके प्रहरीले सोमबार आलुको भन्सार गराएर भारतबाट नेपालगन्ज ल्याइएको आलु र प्याजसहित एउटा भारतीय ट्रकलाई पक्राउ गरेपछि उक्त रहस्य खुलेको हो ।
प्रहरीले सोमबार बिहान साढे १ बजेको समयमा वडा प्रहरी कार्यालय नेपालगन्जको टोलीले नेपालगन्ज उपमहानगरपालिका वडा नम्बर ८ रंगशाला आसपास क्षेत्रबाट सामान अनलोड गर्दै गरेको अवस्थामा युपि ७६ के ८६७० नम्बरको इन्डियन बेन्ज ट्रकसहित २६९ बोरा आलु र २१३ बोरा अबैध प्याज सहित ट्रकका चालक भारत उत्तरप्रदेश फरुखाबादका २७ बर्षिय इन्द्रजित सिंहलाई नियन्त्रण लिएको जनाएको छ ।
अरीबा फ्रुट सप्लायर्स नेपालगन्जको नाममा ५०६ बोरा आलुको भन्सार गराएर उक्त ट्रक नेपालगन्ज आएको प्रहरीले बताएको छ ।
५०६ बोरा आलुको भन्सार गराएर ५० केजीको २६९ बोरा आलु (१३४५० किलो) र २० केजीको २१३ बोरा प्याज (४३६० किलो) बरामद गरेको बाँके प्रहरी प्रमुख प्रहरी एसपी ओम बहादुर रानाले जानकारी दिए । बरामद सामानको मूल्य अन्दाजी ६ लाख ७२ हजार ५ सय बराबरको रहेको उनले बताए ।
बरामद गरिएको आलु, प्याज र चालकसहित ट्रकलाई आवश्यक कारवाहीका लागि नेपालगन्ज भन्सार कार्यालयमा बुझाइएको बाँके प्रहरीले जनाएको छ ।
