ABC Sanchar
काठमाडौं संघीय राजधानी उपत्यकामा विद्युतीय बस सेवा सञ्चालन गरिरहेको सुन्दर यातायातले अब विद्युतीय ट्याक्सी सेवा पनि सञ्चालन गर्ने भएको छ ।
‘उपयुक्त वातावरण’ भएमा तिहार पछि उपत्यकाका सडकमा सुन्दर यातायातका विद्युतीय ट्याक्सी गुड्नेछन् ।
सुन्दर यातायात प्रालिले अहिले विद्युतीय ट्याक्सी सञ्चालनका लागि सरकारबाट अनुमति प्राप्त गर्ने प्रक्रियामा रहेको जनाएको छ ।
सरकारले जति छिटो अनुमति प्रदान ग¥यो त्यति नै छिटो विद्युतीय ट्याक्सी सञ्चालन गरिने सुन्दर यातायातका अध्यक्ष भेषबहादुर थापाले जानकारी दिए ।
सुन्दर यातायात प्रालिले दशैं, तिहार तथा छठ पर्वको शुभकामना सन्देश जारी गर्दै छिट्टै विद्युतीय ट्याक्सी २सेवा शुरु गर्ने जानकारी गराएको हो ।
सुन्दर यातायातले ४ सिट क्षमता र ५ सिट क्षमताका दुईवटा विद्युतीय कारलाई ट्याक्सीका रुपमा सञ्चालनमा ल्याउने जनाएको छ ।
४ सिट क्षमताको भएको ट्याक्सीमा ३२ किलोवाट क्षमताको ब्याट्री हुने छ । यो कार एकपटक चार्ज गरेपछि १ सय ५० किलोमिटरसम्म कुद्ने छ ।
यस्तै, ५ सिट क्षमताको कारमा ४२ किलोवाट क्षमताको ब्याट्री प्याक हुनेछ । यो कार एकपटक चार्ज गरेपछि २ सय किलोमिटर सम्म कुद्ने छ ।
हाल पेट्रोल इन्जन भएका सुजुकी अल्टो ८००, हुन्डाइ ईओन, टाटा ई–जेटा लगायतका कारहरु काठमाडौंमा ट्याक्सीका रुपमा प्रयोग भइरहेका छन् ।
केही समय अगाडि मात्रै सरकारले ट्याक्सीका सन्दर्भमा नयाँ मापदण्ड जारी गरेको थियो । यद्यपि नयाँ मापदण्डअनुसारका ट्याक्सी भने सडकमा गुडिसकेका छैनन् ।
विद्युतीय ट्याक्सीका सन्दर्भमा भने सरकारले कुनै निश्चित मापदण्ड तोकिसकेको छैन ।
