महेन्द्र सिंह बाँके बैजनाथ गाउँपालिकाको सम्झना चोकबाट बिहीबार १० किलो अफिम सहित जाजरकोटका तिलकबहादुर शाहीलाई बाँके प्रहरीले पक्राउ गरेको छ ।
बाँके प्रहरीका अनुसार ठूलो मात्रामा अफिम कारोबार भइरहेको छ भन्ने सूचना पाए लगत्तै चेकजाँच गर्दा जाजरकोटका शाहीलाई उक्त लागुऔषध अफिमसहित पक्राउ गरिएको जिल्ला प्रहरी कार्यालय बाँकेका प्रहरी प्रमुख एसपी ओम बहादुर रानाले जानकारी दिए ।
लागुऔषध अफिमको मोलमोलाई भइरहेकै बेला लागुऔषध अफिम सहित शाहीलाई नियन्त्रणमा लिइएको हो । नियन्त्रणमा लिदाँ दश किलो चार सय ग्राम तौल अफिम भएपनि पलास्टीकमा प्याकिङ्ग गरिएकोले नेट १० केजी हुनसक्ने आँकल गरिएको एसपी रानाले बताए । पक्राउ परेका शाही स्वयम लागुऔषध अफिम उत्पादक र यसको कारोबारी रहेको खुल्न आएकोछ । उनका अनुसार जाजरकोटबाट बाँके अफिम बेच्न शाही आफै आएका हुन् ।
पक्राउ परेका शाहीलाई लागुऔषध अफिम सहित यतिबेला जिल्ला प्रहरी कार्यालय बाँकेको हिरासतमा राखिएकोछ ।
पहाडी जिल्लामा उत्पादन हुने अफिम बाँके, बर्दियाबाट कारोबार भइ भारत तथा तेस्रो मुलुक पैठारी हुने गर्छ । यताबाट अफिम तस्करी गरि उता पठाउने र उताबाट सोही अफिमबाट ब्राउनसुगर बनाएर नेपाल भित्र्याइने गरिन्छ ।
केही दिनअघि ब्यूरोको टोलीले बाँकेको कुसुमबाट तीन किलो अफिम सहित एकजनालाई पक्राउ गरेको थियो । केही महिना अघि बाँकेकै कुशुमबाट १० किलो अफिम सहित तीन जना पक्राउ परेका थिए ।
