गृहमन्त्रालयले देउसी भैलोबाट हुने सङक्रमण र पटका नियन्त्रण गर्न निर्देशन

प्रकशित मिति : २६ कार्तिक २०७७, बुधबार ०६:४५

(ABC क्राईमबिट) काठमाडौं उपत्यकाका तीन ओटा जिल्लाहरु काठमाडौं, भक्तपुर र ललितपुरका प्रमुख जिल्ला अधिकारी, सुरक्षा निकायको भर्चुअल बैठकले तिहार, नेपाल सम्वत्, छठलगायतका पर्वहरुमा हुनसक्ने सुरक्षा सावधानी तथा स्वास्थ्य सावधानी बारे निर्णय गर्ने भएको छ । बुधबार बस्ने बैठकबाट चाडपर्वहरुमा भिडभाड कम गर्न र स्वास्थ्य सुरक्षा कसरी अपनाउने भनेर निर्णय हुने काठमाडौंका प्रमुख जिल्ला अधिकारी जनकराज दाहालले बताउनुभयो । ‘हामीले सुरक्षा योजना, कोभिडको सर्तकर्तासँगै चाडपर्वमा लक्षित योजना बनाउने बिषयमा भर्चुअल बैठकबाट निर्णय गर्नेछांै’ उहाँले भन्नुभयो । ‘हामी बैठक लगत्तै बैठकले गरेका निर्णयहरु सार्वजनिक गर्नेछांै’ उहाँले थप्नुभयो । बैठकमा सबै निकायबाट प्रतिनिधित्व हुने भएकाले सबैको राय सुझावको आधारमा निर्णय हुने उहाँले बताउनुभयो गृह मन्त्रालयले देशका सबै जिल्लाहरुमा र कोभिडको अत्याधिक संक्रमण देखिएको काठमाडौं उपत्यकाका तीनओटा जिल्लाका जिल्ला प्रशासन कार्यालय, प्रहरी, सशस्त्र प्रहरी, राष्ट्रिय अनुसन्धान तथा स्वास्थ्यकर्मीलाई चाडपर्वमा सुरक्षा सर्तकर्ता अपनाउन निर्देशन दिइसकेको छ । चाडपर्व पनि मनाउने र कोभिडको जोखिम समेत बढ्न नदिन काम थाल्न गृह मन्त्रालयले निर्देशन दिएको हो । गृह मन्त्रालयका प्रवक्ता चक्रबहादुर बुढाले ठूला पर्वहरु हाम्रो आँगनमा आएको र कोभिडको समेत अत्याधिक जोखिम बढेकाले त्यसबाट कसरी बच्ने र आम नागरिकहरुलाई जोगाउन सकिन्छ भनेर सुरक्षा योजना बनाउन प्रमुख जिल्ला अधिकारीहरु, प्रहरी तथा सुरक्षा निकायलाई निर्देशन दिएको बताउनुभयो । उहाँले तिहारमा एकातिर कोभिडको जोखिम र अर्कोतिर जुवातास, पटका र भुइचम्पाले असर पार्ने भएकाले त्यस्तो कार्य रोक्न निर्देशन भैसकेको बताउनुभयो । उहाँका अनुसार धेरै जिल्लाहरुले सुरक्षा योजना बनाएर काम सुरु गरेको बताउनुभयो । कोभिडको अत्याधिक जोखिम भएकाले देउसी र भैलो पाउने नपाउने नियमको कार्यान्वयन सम्बन्धित जिल्ला प्रशासन कार्यालयले गर्ने उहाँले स्पष्ट पार्नुभयो । पटका पड्काउने, भुइचम्पा बाल्ने , जुवातास खेल्न कार्य गरेको पाइएमा तत्कालै कारवाही गरिने प्रवक्ता बुढाले जानकारी दिनुभयो ।

प्रकशित मिति : २६ कार्तिक २०७७, बुधबार ०६:४५