महेन्द्र सिंह
बाँके तिहार नजिकिँदै गर्दा सशस्त्र प्रहरीले बियोपी जमुना सीमा नाकामा अझ थप कडाई गरेको छ बिहीबार भन्सार छली गरेर ल्याइरहेको अवैध सामग्रीहरु दिनहुँजसो बरामद गरिरहेको सशस्त्र प्रहरी बाँकेले तिहार नजिकिएसंगै नाकामा हुने चोरी पैठारी, लागूऔषध ओसारपसार, मानव वेचबिखन जस्ता सबैखाले आपराधिक घटना रोक्न बाँके सशस्त्र प्रहरी बियोपी जमुना दिनरात लागिपरेको छ ।
यसै क्रममा बिहीबार विहान नेपालगञ्ज उपमहानगरपालिका वडा नम्बर १५ टंकपसेरीस्थित दशगजा नजिक भारतबाट नेपालतर्फ अवैधरुपमा ल्याइँदै गरेको सामग्रीहरु बरामद गरेको छ । सशस्त्र प्रहरी निरिक्षक जीवनलाल बुढोका कमाण्डामा खटिएको ७ जनाको गस्ती टोलीले लत्ताकपडा, मोटरसाइकलको रिंग केराउ र जुत्ता बरामद गरेको र युपी ३२ ईई ४२५५ नम्बरको मोटरसाइकलमा ल्याइरहेको अवस्थामा सशस्त्र प्रहरीलाई देखेर सामान र मोटरसाइकल छाडेर तस्कर भागेको सशस्त्र प्रहरीले जनाएको छ । १ लाख २२ हजार ३ सय ५० मूल्य बराबरका ती सामग्री आवश्यक कारबाहीका लागि नेपालगन्ज भन्सार कार्यालय पठाइएको बियोपी जमुना भन्सार प्रहरी साहेक निरीक्षक सन्तोष शर्माले जानकारी दिनुभएको छ ।
