नेपाल कम्युनिष्ट पार्टीका संस्थापक नेता गौतमको अन्त्येष्टी

प्रकशित मिति : २४ मंसिर २०७७, बुधबार २१:१०

(ABC Sanchar)
दाङ । नेपाल कम्युनिष्ट पार्टीका दाङ जिल्लाका संस्थापक मणिकलाल गौतमको बुधबार नै दाहसंस्कार गरिएको छ । घोराहीको रझेना स्थित शंखे पिपल घाटमा अन्त्येष्टि गरिएको हो । त्यस अवसरमा श्रद्धाञ्जली मन्तब्य ब्यक्त गर्नुहुँदै लुम्बिनी प्रदेशका मुख्यमन्त्री तथा नेकपाका स्थायी कमिटि सदस्य शंकर पोखरेलले सरकारले कम्युनिष्ट पार्टीमाथि प्रतिबन्ध लगाएको कठीन अबस्थामा पनि पार्टीप्रति प्रतिबद्ध भएर लागेकाले नै पार्टी अहिले यो स्थानमा पुगेको बताए ।
अहिले कम्युनिष्ट आन्दोलन मुख्य शक्तिका रुपमा स्थापित भएको भन्दै यो शक्ति निर्माणकालागि गौतमलगायत संस्थापकहरुको योग्दान महत्वपूर्ण रहेको उनको भनाई छ । कम्युनिष्ट आन्दोलनमा मात्रै नभई नेपालको प्रजातान्त्रिक आन्दोलनमा पनि अग्रजहरुको भूमिका महत्वपूर्ण रहेको भन्दै यसबाट अबको नयाँ पुस्ताले पाठ सिक्नु पर्ने बताए ।
पार्टीमा समस्या देखिएमा अग्रजहरुको सल्लाह, सुझाब लिएर कमीकम्जोरीहरु सुधार गरि एकढिक्का बनाउने गरेको समेत उनको भनाई छ । अहिले पनि पार्टी भित्र समस्या देखिएको भन्दै यस्तो गम्भीर अबस्थामा अग्रजहरु गुमाउनु पर्दा दुःखी भएको समेत उनले बताए ।
साथै प्रदेश सरकारको स्थापना दिवसको अवसरमा गौतमलाई पदकले सम्मान गर्ने भनि छनोट समेत गरेको उहाँले जानकारी दिनुभयो । घोराही उपमहानगरपालिका वडा नं. १८ रझेना निवासी गौतमको ९३ वर्षको उमेरमा आज विहान करीव ३ बजेतिर निधन भएको हो । गौतम नेपाल कम्युनिष्ट पार्टी (नेकपा) का केन्द्रीय सल्लाहकार परिषद्का सदस्य समेत रहेका थिए ।
निधनप्रति नेपाल कम्युनिष्ट पार्टी(नेकपा)का केन्द्रीय सदस्य तथा लुम्बिनी प्रदेश सचिब जगप्रसाद शर्मा‘अपार’ले दुःख ब्यक्त गरेका छन् । २००९ सालमा कम्युनिष्ट पार्टीको स्थापना हुँदा गौतमको योग्दान महत्वपूर्ण रहेको भन्दै उनको योग्दान, अनुभव र शिक्षा सधै सम्झिने र अनुशरणगर्ने समेत बताए ।