सात जना मन्त्रीहरुले दिए सामूहिक राजीनामा

(ABC Sanchar)
काठमाडौँ । प्रधानमन्त्री केपी शर्मा ओली नेतृत्व सरकारका सात जना मन्त्रीले राजीनामा दिएका छन् । प्रधानमन्त्री अ‍ोलीले संसद भंग गर्ने सिफारिस गरेपछि सात जना मन्त्रीले राजीनामा दिएका हुन् ।
पुष्पकमल दाहाल प्रचण्ड निकट मन्त्रीहरु उर्जामन्त्री वर्षमान पुन, शिक्षामन्त्री गिरीराजमणि पोखरेल, वनमन्त्री शक्ति बस्नेत, खानेपानी मन्त्री विना मगर र श्रममन्त्री रामेश्वर राय यादवले राजीनामा दिएका छन् ।
त्यस्तै माधवकुमार नेपालनिकट मानिएका कृषिमन्त्री घनश्याम भुसाल र पर्यटनमन्त्री योगेश भट्टराईले पनि राजीनामा दिएका छन् । आइतबार बिहान बसेको मन्त्रिपरिषदको बैठकमा प्रधानमन्त्री ओलीले संसद विघटन गर्ने निर्णय सुनाएपछि प्रदीप ज्ञवाली, योगेश भट्टराई, घनश्याम भुसाल, बर्षामान पुन, रामबहादुर थापा लगायतले विरोध गरेका थिए ।