(ABC Sanchar)
काठमाडौं । प्रधानमन्त्री समेत रहेका नेपाल कम्युनिस्ट पार्टी (नेकपा)का अध्यक्ष केपी शर्मा ओलीलाई पार्टीबाट कारबाही सिफारिस गरिएको भन्दै निर्वाचन आयोगमा जानकारी गराइएको छ ।
नेकपाका स्थायी कमिटी सदस्य लिलामणि पोखरेलले सोमबार दिउँसो आयोगको कार्यालय पुगेर आइतबार बसेको स्थायी कमिटी बैठकले ओलीलाई अनुशासनको कारबाही सिफारिस गरेको जानकारी गराएका हुन् ।
आयोगमा पुगेका पोखरेलले हिजो (आइतबार) बसेको स्थायी कमिटीले गरेको निर्णयानुसार ओलीलाई अनुशासनको कारबाहीका लागि सिफारिस भएको जानकारी आयोगमा गराएको बताए ।
आइतबार प्रधानमन्त्री ओलीको सिफारिसमा राष्ट्रपति विद्यादेवी भण्डारीले संघीय संसदको प्रतिनिधि सभा विघटनको घोषणा गरेकी थिइन् ।
ओलीले संसद विघटनको निर्णय गरेपछि आइतबार बसेको नेकपाको स्थायी कमिटी बैठकले उनीविरुद्ध अनुशासनको कारबाहीका लागि केन्द्रीय कमिटीमा सिफारिस गर्ने निर्णय गरेको थियो ।
केन्द्रीय कमिटीको बैठक मंगलबार (पुस ५ गते) बोलाइएको छ ।
ओलीले भने आफू अनुपस्थित भएको बैठकले गरेको निर्णय मान्य नहुने बताएका छन् ।
अर्का अध्यक्ष पुष्पकमल दाहाल प्रचण्ड ‘उपाध्यक्ष सरह’ मात्रै भएकाले उनको नेतृत्वमा बसेको बैठकले आफूलाई कारबाही गर्न नसक्ने ओलीको भनाइ छ ।
