प्रकशित मिति : ९ पुष २०७७, बिहीबार ११:१४

 

(ABC Sanchar)
काठमाडौँ । वैदेशिक रोजगार विभागले साउदी अरब जान लागेका युवासँग मनलाग्दी पैसा असुली गरेको अवस्थामा राजधानीको एउटा वैदेशिक रोजगार व्यवसायी कम्पनीलाई आकस्मिक कारबाही गरेको छ ।
विभागको आकस्मिक अनुगमन टोलीले अनुगमनका क्रममा काठमाडौँको धुम्बाराहीस्थित मनास्लु इन्टरनेसनल सर्भिस प्रालिमा साउदी जाने युवासँग पैसा लेनदेनकै कारोबार गरेको अवस्थामा फेला पारेपछि कारबाही गरेको हो ।
साथै विभागको अनुगमन टोलीले उक्त रोजगार कम्पनीका सञ्चालकलाई आवश्यक कागजातसहित २४ घण्टाभित्र विभागमा उपस्थित हुनसमेत निर्देशन दिएको जनाएको छ ।
साउदीको हेल्दी फुड्सको एलटीडीमा कफी मेकर पदमा जान लागेका युवासँग कम्पनीका एक कर्मचारीले प्रतिव्यक्ति एक लाख रुपियाँभन्दा बढी रकम मागेको र पैसा नदिए भिसा रद्द गर्नेसम्मको धम्की दिएपछि प्रभावित युवाले विभागमा उजुरी गरेका आधारमा विभागको टोलीले अनुगमन गरेको थियो ।
विभागको अनुगमन टोलीले ठगीमा परेका युवाले बुझाएको रकमसहित कम्पनी सञ्चालकलाई फेला पारेको जनाएको छ । वैदेशिक रोजगारको ऐनअनुसार मलेसिया र खाडीका छ देशमा जान १० हजार रुपियाँभन्दा बढी लिन पाइँदैन तर म्यानपावर कम्पनीले भने खुलेआम विदेश जाने युवासँग लाखौँ रुपियाँ असुल गर्ने गरेका छन् । उक्त टोलीले अनुगमनका क्रममा भिसा लागेका युवालाई सरकारले तोकेको शुल्कमा साउदी उडाउन र साउदी पुगेपछि कुनै प्रकारको नियोजित दुःख नदिनसमेत निर्देशन दिएको छ । विभागले जुनसुकै बेला चर्को असुलीविरुद्ध उजुरी आउन सक्ने र वैदेशिक रोजगारमा जाने श्रमिक ठगिन सक्ने हुँदा शनिबार वा कार्यालयको समयबाहेकको समयमा पनि अनुगमन हुने स्पष्ट पारेको छ ।
यसअघि विभागले गएको तीन महिनाका बीचमा ६० वटा म्यानपावरको आकस्मिक अनुगमन गरी ४५ वटालाई त कारबाही नै गरिसकेको जनाएको छ ।रासस


सम्बन्धित

दर्ता विवरण

सूचना विभाग दर्ता नंः १३२५/०७५/७६

Twitter

Contact

सम्पादक – नुकेन्द्र प्रताप सिंह-
सम्पर्क-9848262615
संचालक – सागर थापा
सम्पर्क – 9847845918
email- [email protected]

Copyright © 2015-2021 AbcSanchar.com