(ABC Sanchar)
सिन्धुपाल्चोक । भूकम्पपछि बन्द रहेको नेपाल चीनबीचको सीमा तातोपानी नाका सञ्चालन नगरेको भन्दै स्थानीयले विरोध प्रदर्शन गरेका छन् ।
सीमा क्षेत्र सिन्धुपाल्चोकको तातोपानी नाकामा स्थानीयवासीले नाका खुला भएको भनिएपनि एकतर्फी रुपमा बन्द गरिएको भन्दै चीनविरुद्ध प्रदर्शन गरेका हुन् ।
शनिवार स्थानीय नागरिक, व्यापारीले चीनले एकतर्फी रुपमा नाकाबन्द गरेको भन्दै विरोध प्रर्दन गरे ।
उनीहरुले चीनले अघोषित रुपमा तातोपानी सीमामा नाकाबन्दी गरेको आरोप लगाए । स्थानीयले नाका खोलेको नाटक गरिएको भन्दै त्यसको विरोधमा प्लेकार्ड बोलेका थिए । उनीहरुले मजदुरको रोजिरोटी सुनिश्चि गर्नुपर्ने रोकिएको सामान ल्याउने वातावरण बनाउनपर्ने लगायतका माग लेखिएका प्लेकार्ड बोकेका थिए ।
मोटरसाइकल र्यालीसहित नाकामा पुगेर उनीहरुले कोणसभा आयोजना गरेका थिए । प्रदर्शनमा सहभागी स्थानीयवासी तथा नेपाली कांग्रेसको भ्रातृ संठगन तरुण दलका जिल्ला अध्यक्ष दोर्जे लामाले चीनको अघोषित नाकाबन्दीले समस्यामा परेका स्थानीयवासी र व्यवसायी बाध्य भएर प्रदर्शनमा उत्रनु परेको बताए । उनले चीनले नाका खोलेको भनेपनि व्यवहारले त्यस्तो नदेखाएको बताए ।
प्रदर्शनमा सहाभागी सिन्धुपाल्चोकका ट्रक कन्टेनर व्यवसायी संघका अध्यक्ष अर्जुन सापकोटाले सिल्क ट्रान्सपोर्टले गरिरहेको एकाधिकारले अन्य ट्रक कन्टेनर व्यवसायीहरु समस्यामा परेको बताए ।रासस
