(महेन्द्र सिंह)
बाँके। जिल्ला प्रहरी कार्यालय बाँकेले नेपाल भारत सिमामा निगरानी बढाएको छ । देशको राजनीतिक परिस्थितिका कारण शान्ति सुरक्षामा चुनौती थपिएको भन्दै बाँके प्रहरीले जमुना नाकामा कडा चेकजाँच र निगारानी बढाएको छ ।
मंगलबार बिहान् नेपालगन्जको जमुनाह नाकामा आफै चेकजाँचमा खटिएका जिल्ला प्रहरी कार्यालय बाँकेका प्रहरी प्रमुख एसपी ओम बहादुर रानाले शान्ति सुरक्षा कायम गर्ने सवालमा प्रहरी अहोरात्र खटिएको बताए । तालिम प्राप्त प्रहरी कुकुरसहित चेकजाँचमा खटिएका एसपी रानाले हातहतियार तथा लागू औषध नियन्त्रणका लागि प्रहरी अहोरात्र खटिएको बताउनुभयो ।
पछिल्लो समय देशको राजनीतिक अबस्था घटनाले हातहतियारको ओसारपसार हुने सक्ने भन्दै यसलाई निस्तेज पार्न नाकामा तीब्र कडाइ गरिएको छ । नेपाल भारतको बाँके खण्ड ७९ किलोमीटर खुला सिमा रहेकाले त्यसैअनुसार सुरक्षाकर्मी परिचालन गरेर शान्ति सुरक्षा कायम गरिएको एसपी रानाले बताउनुभयो । दुई देशबीच खुला सिमाको फाइदा उठाउदै अपराधीहरुले अपराध गर्न सक्ने भएकाले दुबै देशका सुरक्षाकर्मिहरु मिलेर त्यसलाई निरुत्साहित पार्ने काम भैरहेको पनि बताउनुभयो । बाँकेमा खुला सिमानाका कारण लागू औषधको कारोबार तथा ओसारपसार रोकन प्रहरीलाई चुनौतीपुर्ण रहेको एसपी रानाले जानकारी दिनुभएको छ ।
