(ABC Sanchar)
राजबिराज । सप्तरीको विष्णुपुर गाउँपालिका–६ गोरगमा आज (सोमबार) बिहान एउटा पिकअप भ्यानमा आगजनी गरिएको छ । स्थानीय बेचन मुखियाको पिकअप भ्यानमा बिहान अपरिचित व्यक्तिको एक समूहले आगजनी गरेको प्रहरीले जनाएको छ ।
स्थानीय बेचन मुखियाले आफ्नै घर अगाडि पार्किङ गरेर राखेको स १ च १७२५ नम्बरको भ्यानमा अपरिचित व्यक्तिहरुले आगो लगाइदिएका हुन् । आगजनीबाट भ्यानको अगाडिको भाग पूर्णरुपमा जलेर नष्ट भएको जिल्ला प्रहरी कार्यालयका प्रहरी नायब उपरीक्षक भुवनेश्वर साहले जानकारी दिए ।
घर अगाडि पार्किङ गरी राखिएको अवस्थामा बिहान करिब १ः०० बजेतिर परालमा पेट्रोल छर्केर आगजनी गरेको पीडित मुखियाले बताए । सो आगलागीबाट झण्डै रु २४ लाख भन्दा बढीको क्षति भएको प्रहरीले अनुमान गरेको छ ।
पिकअपमा आगजनी व्यक्तिगत रिसिइबिका कारण गरेको हुनसक्ने अनुमान गरिएको छ । घटनामा संलग्नको खोजी र घटनाबारे थप आवश्यक अनुसन्धान भइरहेको प्रहरीले जनाएको छ ।
