(सागर थापा/तेज वली)
दाङ । जिल्ला ट्राफिक प्रहरी कार्यालय दाङले तुल्सीपुरमा ट्राफिक डमी राखेर ट्राफिक नियमको पालनालाई प्रभावकारी बनाउन थालेको छ । यसैक्रममा तुलसीपुरको विरेन्द्र चोक बसपार्क पिपलबोट र बाहिनी चोकमा डमी ट्राफिक राखेर ट्राफिक नियमको पालनालाई प्रभावकारी बनाउन थालेको छ ।
ट्राफिक नियमलाई प्रभावकारी बनाउन प्रहरीले यो अभियान थालेको जिल्ला ट्राफिक प्रहरी कार्यालय दाङका ट्राफिक प्रमुख प्रहरी निरीक्षक थम्मन जीसीले बताए ।
ट्राफिक डमीका दुई हातमा ट्राफिक नियमसम्बन्धी सचेतनामूलक सन्देश लेखिएको बोर्ड राखिएको छ । जसले चालकलाई सतर्क मात्र नभई यात्रुहरुलाई समेत ट्राफिक नियमबारे जानकारी दिने छ ।
ट्राफिक प्रहरीको अभावमा पनि डमीको सहायताले ट्राफिक नियम पालना गर्ने कार्यलाई प्रभाबकारी बनाउन सकिने उहाँको भनाई छ ।आइतबार तुलसीपुरमा एक कार्यक्रमको आयोजना गरि ट्राफिक डमी राखिएको हो ।
तुलसीपुर उपमहानगरपालिका वडा नम्बर ५ का अध्यक्ष विरेन्द्र शाहको अध्यक्षतामा कार्यक्रम गरि शाह सहित लुम्बिनी प्रदेश ट्राफिक प्रहरी कार्यालय प्रमुख एसपी डम्बर बहादुर बिक जिल्ला प्रहरी कार्यालय दाङका प्रहरी प्रमुख एसपी गणेश चंन्द ईलाका प्रहरी कार्यालय तुलसीपुरका प्रहरी प्रमुख डिएसपी शिव बहादुर सिंह लगाएतको उपस्थित रहेको थियो। कार्यक्रमको सहजीकरण रिपोर्टस क्लब दाङका अध्यक्ष पत्रकार सरद रेग्मीले गर्नुभएको थियो ।
