ABC (क्राईमबिट)
बुटवल । सशस्त्र प्रहरी बलका २ जना अधिकृत (इन्सपेक्टर र सई) ५० हजार रुपैयाँ घुस रकमसहित पक्राउ परेका छन् ।
रुपन्देहीको गैडहवा गाउँपालिका–३ लोण्डिहवास्थित सशस्त्र प्रहरी बल नेपाल सुरक्षा बेस क्याम्पका कार्यालय प्रमुख सशस्त्र प्रहरी निरीक्षक (इन्सपेक्टर) दधिराम पौडेल र सोही बेस क्याम्पका सशस्त्र प्रहरी नायव निरीक्षक (सई) राजेश पासी ५० हजार रुपैयाँ घुस लिइसकेको अवस्थामा पक्राउ परेका हुन् ।
पूर्व सूचनाको आधारमा अख्तियार दुरुपयोग अनुसन्धान आयोगको बुटवलस्थित कार्यालयबाट खटिएको टोलीले उनीहरुलाई घुस रकमसहित नियन्त्रणमा लिएको हो ।
काठको फर्निचर उधोग सञ्चालनमा सहजीकरण गरिदिने भनेर सेवाग्राहीबाट ५० हजार घुस लिइसकेको अवस्थामा उनीहरूलाई नियन्त्रणमा लिइएको अख्तियारले जनाएको छ।
उनीहरूलाई रुपन्देहीको गैडहवा गाउँपालिका वडा नम्बर ३ बाट बिहीबार बिहान १० बजे नियन्त्रणमा लिएको अख्तियार बुटवल कार्यालयका सूचना अधिकारी सुरेश भुसालले जानकारी दिए ।
