ABC (क्राईमबिट)
काठमाडौं । स्रोत नखुलेको ४२ लाख रुपैयाँ नगदसहित भक्तपुर प्रहरीले १ जनालाई पक्राउ गरेको छ ।
अरनिको राजमार्गअन्तर्गत मध्यपुर ठिमी नगरपालिका–३ कौशल्टार सुरक्षा चेकजाँचको क्रममा महानगरीय प्रहरी वृत्त ठिमीको टोलीले नगदसहित १ जनालाई पक्राउ गरेको हो ।
पक्राउ पर्नेमा दोलखा घर भइ हाल भक्तपुरको सूर्यविनायक नगरपालिका–३ बालकोट रोज भिलेज बस्ने सुमन घिमिरे छन् ।
महानगरीय प्रहरी वृत्त ठिमीका अनुसार जाँचका क्रममा गाडीमा आइरहेका घिमिरेको साथबाट २७ लाख रुपैयाँ बरामद भएको हो ।
साथै उनको कोठा खानतलासी गर्दा थप १५ लाख रुपैयाँ बरामद भएको प्रहरीको भनाइ छ।
प्रहरीले उक्त रकमको स्रोत खोज्दा बताउन नसकेपछि नियन्त्रणमा लिएर अनुसन्धान शुरु गरिएको जनाएको छ ।
प्रारम्भिक अनुसन्धानको क्रममा घिमिरेले उक्त रकम जुवातास खेलेर जितेको हुनसक्ने बताएको छ ।
