(तेज वली)
दाङ । तुलसीपुर उपमहानगरपालिका वडा नं. १२ स्थित टरिगाउँ एयरपोर्टमा ईन्धन डिपो निर्माणको काम अघि बढेको छ । टरिगाउँ विमानस्थलको स्वामित्वमा रहेको जग्गामा ईन्धन डिपो स्थापना गर्न लागिएको हो । त्यसकालागि बिमानस्थलले नेपाल आयल निगमलाई करिब पाँच कठ्ठा जग्गा उपलब्ध गराएको छ । त्यही जग्गामा आयल निगमले ईन्धन डिपो स्थापना गर्ने टरिगाउँ विमानस्थल प्रमुख कैलाश शर्माले बताए ।
शुक्रबार प्रमुख शर्मा र नेपाल आयल निगम तुलसीपुरका प्रमुख सुजित पोखरेलले जग्गा लिजमा दिने÷लिने भनि सम्झौता गरेका हुन् । यस अघि जग्गा प्राप्त नभएकै कारण ईन्धन डिपो स्थापनाको काम अघि बढ्न सकेको थिएन । अब भने काम अघि बढ्ने आयल निगम तुलसीपुरका प्रमुख पोखरेलले बताए । “जग्गा उपलब्ध नहुँदा इन्धन डिपो स्थापनाको काम अघि बढ्न सकेको थिएन”, उनले भने “ अब भने केही समयमा काम सुरु हुन्छ ।”
जग्गा लिजमा लिएको जानकारी केन्द्रमा गराएपछि त्यही अनुसार प्राबिधिकहरु आएर हेरफेर गर्ने र त्यसपछि काम सुरु हुने उनले बताए । “हामीले माथि जानकारी गराउँछौं, त्यसपछि प्राबिधिकहरु आएर हेर्नुहुन्छ, रुख पनि काट्नु पर्ला, जग्गा सम्म बनाएर ट्याङ्की राख्ने काम हुन्छ”, उनले भने “त्यसकालागि एकहप्ता भित्रमा टोली आउछ ।”
त्यहाँ ७०/७० हजार लिटरका तीन वटा ईन्धन ट्याङ्की निर्माण हुने पोखरेलले बताए । अहिले जग्गा प्राप्त भएकाले ब्राउजर पनि ल्याउन सकिने बताए । “जग्गा प्राप्त भइसक्यो, अब केही समयमा ब्राउजर ल्याउन सकिन्छ”, उनले भने “ ब्राउजर आयो भने त्यसबाट अस्थायी रुपमा काम चल्दै गर्छ, ईन्धन डिपो स्थापनाकालागि पनि काम हुँदै गर्छ ।”
९ हजार लिटर देखि माथिको ब्राउजर हुने भन्दै त्यसैले एक फ्लाईट मात्रै भएर एक हप्तासम्म पुग्ने उनको भनाई छ । यस अघि जग्गा नै नपाउँदा काम रोकिएको भन्दै अब छिट्टै काम पूरा हुने उनले बताए । तीन वटा ट्याङ्कीमा २ लाख १० हजार लिटर भण्डारण हुने उनको भनाई छ । नेपाल बायु सेवा निगम दाङ शाखा प्रमुख नेमकान्त लम्सालका अनुसार दैनिक एक फ्लाईट भएमा मासिक ३० हजार लिटर खपत हुने बताए । ईन्धन डिपोकालागि जग्गा उपलब्ध हुनुले यहाँको हवाई क्षेत्रमा ठूलो फड्को मार्ने भन्दै फ्लाईट बढाउन सके झनै प्रभाबकारी हुने उनको भनाई थियो । उनका अनुसार अहिले १२ बजे तुलसीपुरमा हवाई अवतरण हुने भन्दै अब विहान र बेलुवा फ्लाइट बनाउन सकियो भने थप प्रभाबकारी हुन्छ ।
ईन्धन डिपो स्थापना भएसंगै दाङबाट रुकुम सल्ले, पोखरा, जुम्ला पनि उडान भर्न सकिने उनको भनाई छ । साथै टरिगाउँ एयरपोर्टबाट जुम्लालगायतका स्थानमा हवाईबाट सामान ओसारपसार गर्न सकिने समेत बताए ।
टरिगाउँ एयरपोर्ट रुकुम, सुर्खेत, नेपालगञ्जलगायत पश्चिम क्षेत्रको कनेक्सनका रुपमा रहेको यसको विकासमा पश्चिमको विकास हुने बताए ।
विमानस्थलमा टावर कन्सोल
टरिगाउँ विमानस्थलमा आधुनिक टावर कन्सोल निर्माण सुरु भएको छ । जुन टावरले सूचना दिने कार्य प्रभाबकारी रुपमा गर्ने विमानस्थल प्रमुख कैलाश शर्माले बताए । उनका अनुसार उक्त टावर नेपालगञ्ज्लगायतका स्थानमा जडान भएको छ । जुन टावरमा सबै सामग्री डिजिटल प्रबिधिका हुनेछन् । जसले हावाको गति, पानीको अबस्थालगायत सबै देखाउने भएकाले जहाज अवतरणमा निकै सहज हुने बताए । करिब एक करोडको लगानीमा उक्त कार्य हुन लागेको हो ।
अबको १०/१२ दिनमै काम सकिने छ । अहिले टर्मिनल भवनमा पंखा पनि नभएको, खानेपानीको पनि समस्या रहेको भन्दै उक्त समस्या समधान समिने गरिने उनले बताए ।
दाङबाट काठमाडौं जाँदा दुई किसिमको हवाई भाडा
दाङबाट काठमाडौं जाने हवाई भाडा दुई किसिमको छ । केही दिन देखि नेपाल एयरलाईन्सको जहाजमा दाङको टरिगाउँ एयरपोर्टबाट काठमाडौं जानकालागि ८ हजार ६ सय रुपैँया र ६ हजार दुई सय रुपैँया तोकिएको छ । नेपाल वायु सेवा निगम दाङका प्रमुख नेमकान्त लम्सालका अनुसार अहिले तुलसीपुरमा १९ सिटे जहाज आउछ ।
ति मध्ये १२/१३ वटा सिटको टिकेट काट्दासम्म ६ हजार दुईसय ७० भाडा लिने र त्यो भन्दा माथिको टिकट काट्नु परेमा ८ हजार ६०० लिने गरिएको लम्सालले बताए ।‘सिट सकियो , तर लास्टमा कोही आउछ, ईमरजेन्सी छ, जाने पर्ने हो भने त्यस्ताकालागि हामीले ८ हजार ६ सय रुपैँया लिएर सिट उपलब्ध गराउछौं’, उनले भने‘ ४÷५ जानलाई त्यो सिट दिन सकियो भने हामीले पनि लामो समय सेवा दिन सकौँला, तर, सीट खाली भयो भने हामीले ६ हजार दुईसय ७० रुपैँया नै भाडा लिएर सेवा दिने छौं ।’
काठमाडौंबाट दाङ आउँदा पनि दुईवटा भाडा दर नै छ । एउटा ८ हजार ८ सय रुपैँँया छ, भने अर्को ६ हजार चारसय ६० रहेको छ । आउँदा र जाँदा गरि १० वटा सिट खाली परेमा त्यसले एयरलाइन्सलाई घाटामा पर्ने भएकाले पनि यसरी दुई किसिमको भाडा अनुसार सेवा दिन लागिएको उनले बताए । कोरोनाको कहर पछि यसरी दुई थरि भाडा लिनुपर्ने अबस्था आएको उनले बताए । टरिगाउँ एयरपोर्टमा अहिले नेपाल एयरलाईन्सले उडान भरिरहेका छ । गएको बर्ष भदौ देखि दुईवटा उडान गरिरहेको एयरलाईन्सले लकडाउनको समयमा दैनिक दुई वटा जहाज उडान गर्न सकेन । लडाउनपछि हप्तामा ३÷४ पटक मात्रै उडान हुने गरेको थियो ।
अहिले फागुन २३ गते आईतबार देखि भने दैनिक एउटा उडान भइरहेको प्रमुख लम्सालले बताए । ‘अहिले देशभर दुईवटा टुइनेटर विमान चलिरहेका छन्, यस्तो अबस्थामा दाङमा दैनिक फ्लाईट पाउनु पनि खुसीको कुरा हो’, उनले भने‘लकडाउनको समयमा ६ वटा जहाज फेजआवट भएपछि हामीलाई समस्या हुने गरेको छ ।’
अहिले कोरोनाको खोप पनि आईसकेको अबस्थामा कोरोनाको जोखिम पनि रहेको र दिनपनि लामो हुने भएकाले नेपालगञ्ज, भैरहवाबाट काठमाडौं जाने गरेकोले पनि दाङबाट जाने यात्रुहरुको कमी आएको हो ।
