(महेन्द्र सिंह)
बाँके । गाउँबाट खसी-बाख्रा चोरी गरेर शहर बजारमा ल्याइ बिक्री गर्ने गिरोहका २ जनालाई बाँके प्रहरीले पक्राउ गरेको छ ।
राति गाउँ-गाउँ डुलेर खसी-बोका तथा बाख्रा चोरी गर्ने र बिहानसम्म बजार पुर्याएर बिक्री गर्ने २ जनालाई प्रहरीले पक्राउ गरेको हो ।
पक्राउ पर्नेमा बाँकेको खजुरा गाउँपालिका-६ घर भएका २२ वर्षीय हर्षबहादुर पोख्रेल र बर्दियाको बाँसगढी नगरपालिका-६ घर भएका १९ वर्षीय प्रदीप सुनार छन् ।
विशेष सूचनाको आधारमा जिल्ला प्रहरी कार्यालय बाँकेबाट खटिएको टोलीले उनीहरुलाई आइतबार राति पक्राउ गरेको हो ।
प्रहरीका अनुसार उनीहरुले आइतबार राति बर्दियाको बढैयाताल गाउँपालिका-३ का दीपक सुनारको गोठबाट एउटा खसी र एउटा बाख्रो चोरी गरेका थिए ।
बर्दियाको बढैयातालबाट चोरी गरिएका खसी-बाख्रालाई भे १ हज ४४४३ नम्बरको अटोमा हालेर ल्याउँदै गरेको अवस्थामा प्रहरीले उनीहरुलाई पक्राउ गरेको हो ।
प्रहरीले उनीहरुलाई बाँकेको कोहलपुर नगरपालिका-१२ चप्परगौंडीबाट पक्राउ गरेको हो ।
अटोसहित पक्राउ परेका दुवै जनालाई थप अनुसन्धान तथा आवश्यक कारबाहीका लागि इलाका प्रहरी कार्यालय मैनापोखर बर्दियाको जिम्मा लगाइएको जिल्ला प्रहरी कार्यालय बाँकेले जानकारी दिएको छ ।
