(महेन्द्र सिंह)
बाँके । जिल्ला ट्राफिक प्रहरी कार्यालय बाँके कोहलपुरले चालु आर्थिक वर्षको हालसम्म करिब २ करोड राजश्व संकलन गरेको छ । चालू आर्थिक वर्षको साउनदेखि फागुन महिना सम्म बाँके ट्राफिकले नियम उल्लंघन गर्नेमाथि कारवाही गरेको छ । सबैभन्दा धेरै राजश्व फागुन महिनामा उठाएको बाँके ट्राफिकले जनाएको छ । 
सबैभन्दा कम राजश्व साउन महिनामा उठाएको छ। साउनमा १० लाख ४७ हजार ५ सय रुपैयाँ संकलन गरेको छ । भदौमा १७ लाख २० हजार, असोजमा १९ लाख २४ हजार, कार्तिकमा २२ लाख ४४ हजार रुपैया राजश्व संकलन भएको जिल्ला ट्राफिक प्रहरी कार्यालय बाँकेका ट्राफिक प्रमुख प्रहरी निरीक्षक राजु भण्डारीले जानकारी दिनुभएको छ ।
गत मंसिरमा ३० लाख ९३ हजार ५ सय रुपैया राजश्व उठ्दा पुषमा २७ लाख ६३ हजार, माघमा २७ लाख ५३ हजार र फागुनमा ३५ लाख ४५ हजार राजश्व उठेको ट्राफिक प्रमुख भण्डारीले बताउनुभयो ।
सबैभन्दा धेरै ट्राफिक नियम उल्लघन मोटरसाइकल चालकहरले गरेको पाइएको छ । यो अवधिमा बस, ट्रक, टिप्पर, मोटरसाइकल, ट्याक्टरलगायतका सवारी साधनका चालकले बढी नियम उल्लंघन गरेका पाइएको छ ।
